Shillong, Risaw 22: Ka kynhun ïalehkai jong ka Meghalaya Police ka la ïai bteng ban pynneh ïa ka resol ba paka da kaba pynjlan ïa ka jingjop sha ka saw sien lynter ha ka lympung phutbol First Division 2025 jong ka Shillong Sports Association ha madan First Ground-SSA Stadium, Polo. Kane ka jingjop kaba saw sien lynter ka la wan hadien ba ka la pynliem noh da 2-0 kol ïa ka Lawsohtun SC hynne ka sngi Balang.
Ka MLP ka la ïoh ban lamkhmat ïa ka kylla step da shi kol lyngba u Niawkorlang Kyndiah (37′) shuwa ba kan pynskhem ïa ka jingjop da kaba pynbud ïa ka kol kaba ar ha ka kylla miet lyngba u Rapborlang Marwein (55′).
Shuwa kane, ka jingïalehkai ba nyngkong la sakhi ïa ka Mawkhar SC kaba la khur ïa ka jingjop kaba nyngkong mynta ka samoi da kaba pynliem noh da tang 1-0 kol ïa ka Pohkseh SC.
Ka Mawkhar ka la pynkhih ïa katei ka namtam lyngba u Vobisterfield Marngar ha ka minit kaba 66.
Haba phai sha ka MLP, da kaba jop baroh saw sien lynter ki jingïalehkai, mynta ka la ïoh ban kamai 12 point, hynrei ka sahdien ïa ka Nongkseh kaba ïalam ha khlieh duh jong ka miej. Ka Nongkseh ka ïoh ban bat ïa ka kyrdan ba nyngkong namar ka don ïa ka jingïapher kaba kham bha (goal difference), da +25 la +12 haba ïanujor bad ka MLP.
Ka jingïalehkai ha kane ka sngi Palei kan long hapdeng ka Ryntih SC pyrshah ïa ka Nongthymmai SC ha ka por 2 baje nohphai sngi.
