SHILLONG, Risaw 29: Ka Mawtawar SC ka la ïoh ban khur ïa ka jingjop kaba shyrkhei da kaba pynliem noh da 7-2 kol ïa ka Ryntih SC ha ka jingïakhun jong ka lympung First Division Football League-2025, ba la pynïaid da ka Shillong Sports Association hynne ka sngi Balang ha madan First Ground-SSA Stadium, Polo.
Ha kane ka jingïalehkai la ïoh ruh ban sakhi ïa ka hat trick kaba la thep da u Aldo M Nongneng ha ka minit kaba 15, 32 bad 63 na ka bynta ka Mawtawar. Katba na ka liang jong u Fedrick Lyngdoh (5 & 56) bad u Donkupar Kharmyndai (48 & 59) ki la noh synñiang lang da kaba thep mar ar kol ban pynthikna ïa ka jingjop bad ban khur pura ïa ki lai point.
Ka Ryntih ka la ïohlad ban pynphai ar kol lyngba u Leversharp M Syiemlieh (17) bad u Shngainlang Sohbar (80).
Ka jingïalehkai jong ka SSA 1st Division Football League-2025 ha kane ka sngi Palei (30.10.2025) kan sdang ha ka por 1:15 baje mynsngi hapdeng ka Nongkseh SC pyrshah ïa ka Mawkhar SC.
