Shillong, Risaw 13: Ka Mawtawar SC ka la ïoh ban bteng ïa ka jingïaid lynti da kaba jop ar sien lynter ki jingïakhun ha ka lympung First Division 2024 jong ka Shillong Sports Association hadien ba ka la pynliem noh ïa ka Pohkseh SC da 1-0 kol ha SSA Ground, Polo, ha ka sngi Saitjaiñ.
Ka shi kol na u Elnathan D Wahlang kaba la pynkhih ha ka minit ba 19 jong ka kylla step ka la biang pura ïa ka kynhun ban khur ïa ka namjop.
Kane ka dei ka jingïakhun kaba la thmu ban sdang ïa ka First Division ha ka 5 tarik Risaw, hynrei la pynkynriah noh namar ba jur slap.
Shuwa ka jingïakhun ha ka sngi Saitjaiñ, ka Mawtawar ka la jop ïa ka Nongrah SC ha ka sngi Balang bad mynta ka la khur 6 point.
Ki jingïalehkai mynta kin long ha ka Second Division, ha kaba ka Nongkrem SC kan ïakhun ïa ka PFR Academy, por 12 baje, nangta ka Marbisu SC pyrshah ïa ka Jongksha SC, por 2:45 baje ha SSA Ground, Polo.
