Shillong, Oct 24: Ka Nongkrem SC ka la pynliem noh da 3-1 kol ïa ka Nongrah SC ban khur pura ïa ki lai poiñ ha ka jingïalehkai jong ka lympung First Division Football League 2025 jong ka Shillong Sports Association, kaba la long hynne ka sngi Thohdieng ha madan First Ground-SSA Stadium, Polo.
Ka Nongkrem ka la pynkhihjar lyngba u Sawa Tang (42′), u Balajied Lyngwa (70′) bad u Terrance Jyrwa (85′), katba ka Nongrah ka la pynphai shi kol na u Shanbok Marboh (73′).
Kin don ar tylli ki jingïalehkai ha kane ka sngi Saitjaiñ, 25 tarik Risaw, ha kaba ka MLP kan aireng pyrshah ïa ka Pohkseh SC ha ka por 1:15 baje mynsngi, nangta yn bud sa ka jingïalehkai hapdeng ka Mawtawar SC pyrshah ïa ka Nongkseh SC ha ka por 4:15 baje noh phai sngi.
