Shillong, Nailar 21: Ka Nangkiew Irat ka la khur ïa ka jingjop kaba kongsan pyrshah ïa ka Mawlai ha ka Shillong Premier League 2025, da kaba pynliem noh ïa ka kynhun kaba la rah arsien ïa ka nam lahduh da 2-0 kol ha madan First Ground-SSA Stadium, Polo, hynne ka sngi Palei.
U Himanshu Patil (14’) bad u Ronaldkydon L Nonglait (68’) ki la pynkhihjar mar kylliang ha baroh ar kylla jong ka jingïakhun.
Naduh ba ka la wanphai biang sha ka SPL ha u snem 2022 ka Mawlai ka la ïaid tang kawei ka jingïalehkai shuwa kane ka jingïakhun kaba hynne ka sngi khlem da ïoh thep kol. Kane ka dei ruh tang ka sien kaba saw naduh u snem 2022 ba ki la shah rem ha ka jingïalehkai ka lympung SPL, ha kaba ym shym la wan pyrshah ïa ka Nangkiew Irat.
Baroh arliang mamla ki la jop ïa la ki jong ki jingïalehkai ba sdang mynta u snem 2025, ha kaba ka Mawlai ka la jop da 6-2 kol pyrshah ïa ka Sawmer bad ka Nangkiew Irat da 3-1 kol ïa ka Nongrim Hills. Ka jingjop mynta ka sngi ka mut ba ka Nangkiew Irat kan kiew sha ka kyrdan ba nyngkong ha ka thup kyrdan (provisional listing) da kaba kamai 6 poiñ.
Ka Mawlai ka la khmih lynti ban ïalehkai ïa ka jingïalehkai kaba stet naduh kaba sdang, hynrei kane ka la pher bak-ly-bak, ha kaba ka Nangkiew Irat ka la ïalehkai jai jai ban tehlakam ïa ka jingïalehkai, wat shuwa ba kan pynkhih ïa ka kol lamkhmat. Kane ka rukom lehkai kaba pyrkhing jong ka Nangkiew Irat ka la long ka atiar kaba treikam pyrshah ïa ka Mawlai.
Ki jingbakla ki la don bynta ha baroh ar tylli ki kol. Ka jingsangeh shiphang na ka bynta ban sumar ha madan ka la pynlong ïa ki rangïalehkai ka Mawlai ba kin slem ban ïeng hala ki jong ki bynta ha ka por ba u referee u la sdang biang ïa ka jingïalehkai bad ka Nangkiew Irat ka la pyndonkam hok ïa kane ka kabu da ka bol pashat kaba paka jong u Jefferson Pakyntein kaba la pynrung hapoh phyllaw kol na ka bynta u Himanshu ban pyndei tiak da ka khlieh shapoh kol.
Ha ka kylla miet, ka jingbakla pashat bol jong u rangïalehkai ba mih bujli jong ka Mawlai u Dameki Khongstia ka la pynlong ïa ka Nangkiew Irat ban ïoh ïa ka lad kaba thikna ban tur shakhmat. Ka bol ba la pynrung da u Raikushisha Buam ka la leit sha u Ronaldkydon hapoh phyllaw kol bad u la pyndei tuk tak ar sien da ka kjat shuwa ban shut da kaba tyngeh sha kol na ka kjat kadiang kaba u nongapkol ka Mawlai u Lambhamiki Lamare um shym la lah ban leh eiei.
Watla shah tam ar kol ka mynsiem ïakhun jong ka Mawlai kam shym la pjah hynrei kam shym la lah pat ban pynurlong lane ban thaw ïa ki kabu kiba paka pyrshah ïa ki rangapdien ba khlaiñ bad ba skhem jong ka Nangkiew Irat kiba kynthup ïa arngut ki rangïalehkai ba la kynsai bha u Dibinroy Nongspung (uba la kynriah na Mawlai ha ka por shuwa ka samoi ïalehkai) bad u Restom Khriam.
Watla katta, ka Mawlai kaba la wan baar ha u snem ba la dep ka la ïoh katto katne ki lad kiba thikna, kum ha ka por ba ka jingpyrshang thep kol da ka khlieh jong u Balajied Syiemlieh ha ka kylla step ka la lait tang khyndiat ban rung shapoh kol. Ka jingbakla jong u nongapkol ka Nangkiew Irat u Surjay Kumar Pariyar ka la ailad ïa u Robertson Khongriah hynrei u Pariyar u la lah ban tehlakam biang ïa la ka jong ka jingbakla da kaba khanglad bad ai tang ïa ka korner. Kumjuh ruh ka jingpyrshang kaba kham jam jong u Ricky Chyne la shah khanglad noh ha u Surjay.
Lah ban kdew ba lehse ka Mawlai ka la duna ïa ka bor met bad ka jinglah ban ïalehkai shakhmat jong u Donlad Diengdoh, uba la ïasoh sha Langsning mynta ka samoi. Katba ka Nangkiew Irat, ka la lah ban pynnneh ïa ka kynhun ki rangïalehkai kiba la ïarap ïa ka ban pyndep ha ka kyrdan kaba saw ha ka SPL 2024, bad ka la nang pynkhlaiñ da kaba wanrah ïa ki rangïalehkai trai ri kum u Dibinroy bad u Raikutshisha kumjuh ruh ban soi ïa u Himanshu, uba dei u nongthep kol ba bun tam ha ka Maharashtra Senior Men’s Football League.
Ki jingïalehkai ka lympung SPL 2025 kan bteng biang ha kane ka sngi Thohdieng ha kaba ka kynhun ba bat ïa ka nam lahduh, ka Shillong Lajong kan aireng pyrshah ïa ka Malki ha ka por 4:30 baje janmiet.
