Shillong, Risaw 10: Ka Langsning ka la hap ban ïakhun tyngeh ban khanglad ïa ka jingpyrshang wanphai jong ka Laitkor, da kaba jop 2-1 kol ha ka jingïakhun jong ka lympung Shillong Premier League 2025, kaba la long ha ka janmiet jong ka sngi Thohdieng (10 tarik Risaw) ha madan First Ground, SSA Stadium, Polo.
U Nelson Rymbai (14’) bad u Chusrang Sangma (18’) ki la pynkhihjar na ka bynta ka Langsning tang hapoh 20 minit ba la sdang ïa ka jingïalehkai hynrei ka Laitkor ka la wanrah ïa ka jingïalehkai kaba kyrpang ha ka kylla miet hynrei ka la ïohlad ban pynphai tang kawei ka kol, lyngba u Fridison Wanniang (55’).
Ka jingjop ka la pynlong ïa ka Langsning ban lamkhmat ha ka jingïabeh ban ïaknieh ïa ka nam lahduh ha ka SPL 2025; mynta ka la ïoh ban khur 17 poiñ, da kaba tam 2 poiñ ïa ka Shillong Lajong bad ka Mawlai, hynrei kine ki ar tylli ki kynhun ki dang don kawei ka jingïalehkai ha kti. Katba ka Laitkor, ka dang sah ha ka kyrdan ba hynñiew, bad ka ïaryngkat bad ka Mylliem da 8 poiñ.
Ka suiñbneng ka la ap haduh ban da sdang ka jingialehkai shuwa ba kan hap slap hynrei ka Langsning ka la lah ba kan ïalehkai bha wat hapdeng kane ka jinglong jingman, khamtam ha ki bynta ba sdang jong ka jingïalehkai.
Hadien ba ula duh bad pynsepei ïa katto katne ki kabu ha ka jingïalehkai ba la dep, u Nelson u la pynkhihjar tang mar ïa ïoh ïa ka kabu kaba nyngkong eh jong u ha kane ka jingïalehkai. U nongapkol ka Laitkor u Hukumskhem Marbaniang, u la ïoh ban ktah khyndiat ïa ka bol hynrei u khlem shym la lah ban khanglad ïa ka bol ban tam ïa u laiñ kol.
Nangta hadien saw minit, u Chusrang u la pynkhih ïa ka kol kaba ar kaba la pynlong ïa ka Langsning ba kan pynjlan da 2-0 ïa ka kol lamkhmat.
U slap u la sdang ban jur hadien kane bad ki la don ki bynta ba lang um sawdong ka madan, kaba la pynlong ïa ka jingïalehkai ka kham jynjar ïa ki nongïalehkai. Hynrei watla katta ruh, ka Laitkor ka dang ïohi hi katto katne ki kabu shuwa ban wai shongthait, ha kaba ka jingpyrshang jong u Sandy Kharkongor la shah kyntait noh ha u rangap kol ka Langsning, u Rajat Paul Lyngdoh.
Ka suiñbneng ka la kham rang ha ka kylla miet bad ka Laitkor ka la mih madan ryngkat ka mynsiem ïakhun kaba shlur. U Fridison u la pynphai shi kol ha ka minit kaba 55, kaba la ai mynsiem ïa ka kynhun ba kan ïaid shakhmat bad wad ïa ka kol pynïakhaid.
Ka la don ka jingpyrshang ‘bicycle kick’ kaba itynnad na u Giovanni Syiemiong ha ka minit kaba 73 hynrei u rangïalehkai ba shadien jong ka Langsning u la lah ban pynkiar noh sharud ïa ka bol shuwa ba kan tam ïa u laiñ kol.
Mynta ka sngi Saitjaiñ, 11 tarik Risaw, ka Mylliem kaba wan ha ka kyrdan kaba 8 kan ïakhun pyrshah ïa ka Nangkiew Irat kaba wan ha ka kyrdan kaba saw ha ka por 4:30 janmiet. Ka Mylliem kan nym la lait satia na ka jingshah pynhiar kyrdan da kaba sah tang artylli ki jingïalehkai ha ka samoi ïalehkai ba nyngkong jong ka ha ka SPL bad ka donkam eiei na kaei kaba kan long ka jingïakhun kaba jwat pyrshah ïa ka Nangkiew Irat, kaba dang don ha ka jingïakhun na ka bynta ka nam lahduh wat la ka rukom ïalehkai jong ka ka la duna khyndiat ha kine ki khyndiat sngi.
