Shillong, Nailar 05 : U Roikhihbha Nongtdu ha ka sngi Saitjaiñ u la thep ïa ka kol kaba khatduh bad lehkmen thep kol kum u khlur ïalehkai ba pawnam ka pyrthei u Christiano Ronaldo ha kaba ka Langsning FC ka la pynliem da 5-0 pyrshah ïa ka Malki SC ha ka OC Blue Shillong Premier League (SPL) 2021-22 ha ka jingïalehkai kaba la long ha madan Third Ground, Polo, Shillong.
Nalor u Roikhihbha Nongtdu, ki arngut kiba la thep kol na bynta ka Langsning ki kynthup ïa u Shano Tariang bad u Dibinroy Nongspung kiba thep mar ar kol.
Haba phai sha ka jingïalehkai hapdeng kitei ki ar tylli ki team, ka Langsning ka kamai 14 point katba ka Mali da 4 point. Bad lyngba katei ka jingjop ka Langsning FC ka kamai 17 point bad duna da 2 point ïa ka Mawlai SC kaba bat kyrdan ba nyngkong.
Ka Malki ka la pynkylla shibun ki nongïalehkai ba mih madan ha ka thup ki 11 ngut katba ka Langsning ka pynkylla tang uwei kata da kaba phah shong ben ïa u Surjay Kumar Pariyar bad pynmih madan ïa u Frolicson Dkhar.
Ka jingïalehkai ka long kaba itynnad bad ïakhaid bha ha ka kylla step, hynrei ka Langsning FC khlem pynslem ka la nang ñion sha ka kut jong ka Malki bad dei ha ka minit ba 22 u Shano Tariang u la plie pyrda ïa ka shi kol.
Ka Langsning ka la nang ïakhuh tyngeh bad tang hadien katto katne minit ba la ïaid biang ka jingïalehkai u Shano Tariang (34min) sa shisien u la thep ïa ka kol kaba ar bad haduh kaba kut ka kylla step ka Langsning ka lamkhmat lypa da 2-0.
Haba wanphai sha ka kylla miet, ki rangïalehkai ka Malki ki la ïakhun tyngeh ban pynphai ïa kitei ki ar kol hynrei ki khlem pat ban pyndep ha ka liang ka thep kol. Dei ha ka minit ba 58 u Dibinroy Nongspung u la thep ïa ka kol kaba lai shwa ba un thep biang sa ka kol kaba ar bad kaba saw na bynta ka Langsning ha ka minit ba 59.
Lyngba kitei ki saw kol ka Langsning ka la nang skhem bad khlem da ailad ki la ïakhun tyngeh bad ha ka minit ba 74 jong ka jingïalehkai u Roikhihbha Nongtdu u la thep ïa ka kol kaba khatduh najan ka dieng kol ha kaba ka kynhun ka la khur pura ïa ki lai point.
Ka jingïalehkai ha ka sngi ba ar kan long hapdeng ka Rangdajied United FC pyrshah ïa ka Nangkiew Irat SC ha ka por 4 baje janmiet.
