Shillong, Rymphang 20: Ka jingïakhun jong ka Shillong Lajong FC ban rah ïa ka nam lahduh jong ka OC Blue Shillong Premier League 2024 ka la shah ktah jur hadien ba ka la mad ïa ka jingïakhaid ha ka jingïalehkai pyrshah ïa ka Nongrim Hills SC da mar 1-1 kol ha madan First Ground – SSA Stadium, Polo, ha ka sngi Palei.
Ka Lajong ka lah ban kheiñ ïalade ba ka long kaba donbok ha kane ka jingïalehkai namar ba ka la shah lamkhmat jan baroh shilynter ka kylla miet shuwa ba u Iohborlang L Lyngkhoi (90’+5) un pynïakhaid da ka penalty ha ka khyllipmat shuwa ban kut. U Bankyrshan Ryndong u la pynkhih ïa ka kol na bynta ka Nongrim Hills ha ka minit kaba 47.
Kane ka resol ka mut ba ka Lajong ka la aiti ïa ka kabu kaba khraw ïa ka Mawlai SC kaba ïakhun ban ïada ïa ka burom. Ka SLFC mynta ka la kamai 33 poiñ na ki 14 tylli ki jingïalehkai, katba ka Mawlai ka khur 35 poiñ na ki 13 sien ïalehkai. Ka Nongrim Hills ka dang sah ha ka kyrdan kaba phra- mynta ka ïa ryngkat da kaba kamai 15 poiñ bad ka Sawmer SC bad ka don ïa ka jingïapher kol kaba kham bha hynrei dei ka Sawmer kaba bat ïa ka rekod kaba kham bha ha ka jingïalehkai ba ki ïakynduh pyrshah.
Mynta ka sngi kin don ar tylli ki jingïakhun. Ka Ryntih FC kan aireng pyrshah ïa ka Laitkor SC ha ka por 11 baje mynstep bud sa ka jingïalehkai hapdeng ka Sawmer pyrshah ïa ka Mawlai ha ka por 3 baje nohphai sngi.
