Shillong, Naitung 18 : Ka Rangdajied United FC ka la kiew sha ka kyrdan ba ar na ka miej kheiñ point jong ka lympung ïalehkai OC Blue Shillong Premier League 2021-22 hadien ba ka la pynliem noh ïa ka Shillong Lajong FC da 2-0 ha ka jingïalehkai mynta ka sngi Nyngkong ha madan Third Ground, Polo, Shillong.
Kane ka jingïalehkai ka dei kaba la pynsangeh noh shwa ha ka sngi Saitjaiñ jong ka taïew ba lah dep na ka jingshah pynthut ha u slap kaba la pynlang um ïa ka madan ïalehkai.
Shwa ban mih madan, ka Rangdajied ka don ka kyrdan ba saw da kaba khur 8 point katba ka Shillong Lajong ka don ha ka kyrdan ba hynriew da 4 point.
Ka SLFC ka khlem mad nam rem ha ka Fangdajied United FC ha ka SPL naduh ka 31 tarik Risaw 2016. Ka la pynliem ruh ïa ka RUFC ha ka jingïakhun final jong ka lympung ïalehkai Meghalaya State League kaba la long ha u Nohprah 2019.
Ha ka jingïalehkai jong ka kylla step ka rukom ïalehkai jong ka Rangdajied la i ba kan ym lah ban pynliem ïa ka Shillong Lajong. Hynrei, ha ka kylla miet ki rangïalehkai ka Rangdajied ki la ïoh bun ki kabu ban pynkhih jar ruh.
Ha ka kylla step baroh ar ki kynhun ki la ïakhun tyngeh hynrei haduh ba kut ym shym la don kiba lah ban thep kol ha kaba ka jingïalehkai ka la kut noh da 0-0.
Haba wanphai sha ka kylla miet, ka jingïakhun ka la nang ïathnem ba baroh arliang khamtam ka Rangdajied kaba ym hym la lah ban pynliem la bun tylli ki snem, ka la ïakhun tyngeh bad da kane ka jingïakhun ka la ïoh ban pynkhih jar.
U Donboklang Lyngdoh, uba dei u rangthep kol bun tam ka Rangdajied u la khyrwit ha ka minit ba 56 bad ka bol kaba la leit dei noh ïa u dieng kol ka la wanphai biang sha madan ba la poi ha ki kjat u Knerktilang hynrei u rangap dein ka SLFC u Saveme Tariangu la ïoh ban kyrda shwa ba ka jingpyrshang ba ar u Knerktilang la ïoh kem noh da u rangap kol u Wanteilang Malngiang.
Ka Rangdajied ka la ïoh bunsien ban khyrwit sha ka kol jong ka Shillong Lajong hynrei u Wanteilang Malngiang u la ïoh ban kem bad kyrda noh.
Ki minit ïalehkai ki dang ïaid shakhmat ka jingïakhun ruh ka la nang ïathnem, bad ei ha ka minit ba 61 ka Rangdajied ka la ïoh ban plie pyrda nyngkong ïa ka shi kol ba la thep da u Wanlamsuk Nongkhlaw. Lyngba kane ka shi kol, ka kynhun ka la ïoh mynsiem ha kaba ka khlem ailad watla ka Shillong Lajong ka la pyrshang ban ñion shakhmat ban thep kol.
Ki rangïalehkai ka Rangdajied ki la nang ïakhun tyngeh bad pynshat bol ha ka rukom kaba itynnad bha bad shwa ban kut ka jingïalehkai kata ha ka minit ba la aitam (90+4min) u Knerktilang Buam u la thep ïa ka kol kaba ar ha kaba ka Rangdajied United FC ka la khur syndon ïa jingjop.
Lyngba kane ka jingjop, ka Rangdajied United FC mynta ka don ha ka kyrdan ba ar da kaba kamai 11 point. Ka Rangdajied UFC na ki hynriew sien ïakhun ka jop laisien, ïakhaid arsien bad rem shisien katba ka Shillong Lajong ka jop bad ïakhaid shisien bad rem sawsien. Ka don mynta ha ka kyrdan ba hynriew da 4 point.
Ka jingïalehkai mynta ka sngi ba ar kan long hapdeng ka Malki SC pyrshah ïa ka Nangkiew Irat SC ha ka por 4 baje janmiet.
