SPL: Khlem ailad u slap ïa ka jingïakhun hapdeng ka Malki & Nongrim Hills

Shillong, Nailur 11: Ka jingïakhun jong ka lympung Shillong Premier League 2025 hynne ka sngi Thohdieng hapdeng ka Malki bad ka Nongrim Hills ka la shah pynsangeh noh da u referee ba pynïaid ïa ka jingïalehkai tang hadien shiphew minit namar ka jingjur palat u slap.
Ka suiñbneng ka la sdang ban kylla shuwa ban sdang ka jingïalehkai bad u slap uba jur u la ktah ïa ka jinglong jingman jong ka jingïalehkai bad kam shym la ailad satia ïa kane ka jingïalehkai ba kan jam shakhmat hynne ka sngi ha madan First Ground-SSA Stadium, Polo.
Kumta ka jingïalehkai hapdeng kine ki ar tylli ki kynhun kiba shong sha trai duh ha ka miej, kiba dang ïakhun ban lait na ka kyrdan shah sloit (relegation zone) yn sa pynkynriah noh sha kawei pat ka tarik ban pynthikna da ka Shillong Sports Association, ki nongpynïaid jong ka SPL.
Ka jingïakhun kaba itynnad bha hapdeng ka kynhun kaba bat ïa ka nam lahduh, kata ka Shillong Lajong bad ka Langsning la buh ban pynlong mynta ka sngi ha ka por 4:30 janmiet. Mynta ka Lajong ka don ha ka kyrdan kaba lai ha ka miej da kaba kamai 8 poiñ, bud sa ka Langsning kaba don ha ka kyrdan kaba saw kaba la khur 7 poiñ.
Ka jingjop na ka bynta kano kano ka kynhun kan ïarap ïa ka ban kyntiew ïalade ha ka kyrdan ba ha khlieh duh ha ka miej kamai poiñ jong ka SPL 2025.