SPL : Haduh 6-0 kol pynliem ka Mawlai SC ïa ka Nangkiew Irat, ka Sawmer da 4 -1 kol ïa ka Nongrim Hills

Shillong, Rymphang 11 :  Ka Mawlai SC ka la ïoh ban thep haduh 6-0 kol ia ka Nangkiew Irat ha ka lympung ïalehkai jong ka Shillong Premier League 2024 kaba long ha kane ka sngi Ba-ar ha madan SSA, First Ground, Polo.

Ha ka jingïakhun kaba nyngkong, ka Sawmer SC ka la ïoh ban pynliem haduh 4-1 kol ïa ka Nongrim hills.

Tang u Kevin Rymbai marwei u la ïoh ban khyrwit da ka hat-trick kata ha ka minit kaba 47, kaba 58 bad ha ka minit kaba 90+3. Kiwei pat ki nongthep kol ki kynthup ïa u Overkindness L Mawnai uba la ïoh ban pynkhih jar ha ka minit kaba 42, nangta u Banraplang Pyngrope ha ka minit kaba 51 bad u  Donlad Diengdoh uba la ïoh ban thep kol ha ka minit kaba 90+1.

Da kane ka jingjop, ka Mawlai ka la ïoh ban knieh biang ïa ka kyrdan kaba nyngkong ha ka miej kheiñ point na ka Shillong Lajong hadien ba ka la ïoh ban kamai 32 point katba ka Shillong Lajong pat ka neh da ki 29 point.

Haba phai pat sha ka jingïakhun kaba nyngkong, ka jingjop jong ka Sawmer ka la pynlong ïa ka kynhun ban ïoh knieh ïa ka kyrdan kaba hynñiew na ka Nongrim Hills. Ki nongthep kol jong ka kynhun ha kane ka sngi ki kynthup ïa u Bickyson Kharkongor ha ka minit kaba 25, u Aibanraplang Dohling ha ka minit kaba 31, u Shanmeiaki Warlarpih ha ka minit kaba 42 bad u Diego Khyriem ha ka minit kaba 59.

Ia ka shi kol jong ka Nongrim Hills pat la ïoh ban thep da u Alem Khongwir lyngba ka penalty ha ka minit kaba 87. Mynta ka Sawmer ka la kamai 15 poiñ bad ka Nongrim Hills 14 poiñ. Kine ki don mynta hadien ka Nangkiew Irat kaba don ha ka kyrdan kaba hynriew da ki 16 poiñ.

  Ka jingïakhun kaba bud pat kan long ha kane ka sngi Saitjaiñ hapdeng ka Rangdajied United FC pyrshah ïa ka Langsning ha ka por 11baje mynstep katba ka Nongthymmai kan ïakhun ïa ka Sawmer ha ka por 2:30 baje mynsngi.