Shillong, Naitung 14 : Ka Mawlai SC ka la pynbam da 5-0 pyrshah ïa ka Ryntih SC ha ka jingïalehkai ‘Derby’ jong ka lympung OC Blue Shillong Premier League (SPL) 2021-22 ha ka sngi Palei ha madan Third Ground, Polo Shillong.
Lyngba kane ka nam jop ka Mawlai ka dang ïai bteng bat kyrdan ba nyngkong ha ka miej kheiñ point jong katei ka lympung ba don phra tylli ki team ba ïashim bynta.
Haba phai sha ka jingïalehkai, ka long kaba shongshit bad ïakhaid bha khamtam na ka jingwan tuid ki paidbah nongkyrshan jong kitei ki ar tylli ki team kiba la pyndap hi smam ïa ki gallery ba la shna shipor da ka SSA.
Ka jingïalehkai ha ka kylla step ka long kaba mar ïabam la ka long ha ka jingpashat bol bad ruh ha ka liang ka jingïapyrshang thep kol. Ka Mawlai SC kaba la ïakhun tyngeh bad kham ïoh mynsiem na ka jingwan kyrshan ki paidbah, ka la ïoh ban pynkhih jar ba la thep da u Pynbha Suting ha ka minit ba 45m bad lamkhmat da 1-0 haduh kaba kut jong ka kylla step.
Haba wanphai sha ka jingïalehkai jong ka kylla mietm baroh arliang ki la ïakhun tyngeh. Ka Ryntih ka la pynlehnoh ei ïa ki katto katne ki kabu kaba la ai mynsiem shuh shuh ïa ka Mawlai ha kaba u Donlad Diengdoh u la thep ïa ka kol kaba ar ha ka minit ba 48.
Lyngba kitei ki ar kol ka la nang pynskhem ïa ka kynhun kaba la ïakhun tyngeh beit triang khlem ailad ïa ka jingpyrshang thep kol ka Ryntih. Da katei ka jingïalehkai sa shisien ka Mawlai ka la ïoh ban lehkmen biang ïa ka kol ba la thep da u Manbha Ïawphñiaw ha ka minit ba 53 shwa ba un thep biang ïa ka kol kaba ar ha ka minit ba 81.
Watla ka la thep haduh saw kol, ka Mawlai kam pat shym la hun ha kaba ka la nang ïakhun tyngeh bad khatduh u Samuel J.L Kynshi u la thep ïa ka shi kol ha ka minit ba 86 ha kaba ka Mawlai SC ka la pynliem syndon da 5-0.
Ka Mawlai kaba bat kyrdan ba nyngkong ka kamai 15 point khlem mad nam rem ha ki sansien ïakhun. Ka jingïalehkai mynta ka sngi Thohdieng kan long hapdeng ka Langsning FC pyrshah ïa ka Malki SC ha ka por 4 baje janmiet.
