Shillong, Nailur 09 : Ka jingïakhun kaba khatduh bad kaba mar ïa biang bor bha ha ka Round 4 jong ka Shillong Premier League 2025 ka la kut ha ka jingïakhaid kaba mar 1-1 kol hapdeng ka Mylliem bad ka Shillong Lajong ha ka jingïakhun kaba long ha madan SSA Stadium, First Ground Polo ha ka janmiet sngi Baar.
Ha ka jingïakhun dei ka Mylliem kaba ïoh ban pynkhih jar nyngkong lyngba u Remark Kharmalki ha ka minit kaba 41 jong ka kylla step ha shwa ba u Ïohborlang L Lyngkhoi un ïoh ban pynïakhaid noh ha ka minit kaba 76 jong ka kylla miet na ka bynta ka Shillong Lajong.
Na ka liang ka Shillong Lajong ka la ïakhun tyngeh ban ïoh ia ka jingjop khnang ba kan lah ban wan ha khlieh duh jong ka miej kheiñ point hynrei ïa kane ka jingthmu la pulom noh hadien ba ki rangapdien ka Mylliem kim shym la ailad satia.
Kumta da ka jingïakhaid ha kane ka sngi ka Lajong ka la pynkut ïa ka kylla ha ka kyrdan ba lai da ki 8 point katba ka Nangkiew Irat ka dang bteng ban bat ïa ka kyrdan ba nyngkong da ki 10 points. Ka Mawlai ka don ha ka kyrdan kaba ar da ki 9 points bad ka Mylliem ka don hapdeng jong ka miej kheiñ points da ki san point.
Mar ïa put pynwai ïa ka jingïakhun dei ka Mylliem kaba kmen eh namar ki la ïoh ban pynneh ïa ka shi point ïa ka kynhun ba khlainbor jong ka Shillong Lajong .
Ka jingïakhun ha ka kylla kaba san jong kane ka lympung SPL 2025 kan sdang mynta ka sngi hapdeng ka Sawmer pyrshah ïa ka Rangdajied United ha ka por 4.30 baje janmiet.
