Shillong, Nailur 29: Ka Nangkiew Irat ka la kiew biang sha khlieh duh ka miej jong ka Shillong Premier League 2025 da ka jingjop kaba shongkun pyrshah ïa ka Malki da 5-0 kol ha ka jingïakhun kaba la long ha ka janmiet jong ka sngi Nyngkong, 29 tarik Nailur, 2025, ha madan First Ground-SSA Stadium, Polo.
U Ronaldkydon L Nonglait (39’), u Jefferson Pakyntein (58’), u Wallamsuk Nongkhlaw (63’), u Himanshu Patil (69’) bad u Banshanlang Nongdhar (90’+2P) ki la ïoh ban pynkhihjar mar shi sien na ka bynta ka kynhun ban pynthikna ïa ka jingjop kumjuh ruh ban khur pura ïa ki lai point.
Mynta ka Nangkiew Irat ka la ïoh ban kamai 13 point, bad ban tam shi point ïa ka Mawlai, hynrei ka Mawlai ka dangsah kawei ka jingïalehkai ha kti. Katba ka Malki ka dang sah ha ka kyrdan ba phra, bad lait salit na ka thup kyrdan shah sloit (relegation zone), da kaba ïoh 6 poiñ. Kane ka dei ka sien kaba lai ha kane ka samoi ba ka la shah thep san kol ha kawei ka jingïalehkai.
Ka Nangkiew Irat ka la kamai tang shi poiñ na ki ar tylli ki jingïalehkai ba la dep bad ka dang ïaleh ban pynkhie im biang ïa ka jingïakhun jong ka. Hynrei ha ka jingïakhun, dei ka Malki kaba la ïoh nyngkong ïa ki kabu ba thikna ha kane ka jingïalehkai, ha kaba u Elishar Ryntathiang u la pynbor ïa u nongapkol ka Nangkiew Irat u Surjay Kumar Pariyar ban sei ïa ka sap ba kyrpang ban kerda ïa ka bol ha ka minit kaba 17 shuwa ba ka jingpyrshang jong u Cannyson Kharnaior kan shah pynkiar sharud na bynta ka korner kick ha ka minit kaba 30.
Khyndiat minit hadien ba ka jingpyrshang jong u Wallamsuk la shah khanglad ha u rangïalehkai ba shadien, u Ronaldkydon u la ïoh ban pynkhih ïa ka kol kaba nyngkong na ka bynta ka Nangkiew Irat ban lamkhmat da 1-0 kol haba kut jong ka kylla step.
Dei ha ka kylla miet ba ka Nangkiew Irat ka la ïoh ban tehlakam pura ïa ka jingïakhun, ha kaba ka Malki ka la hap ban ïada tyngeh shadien naduh kaba sdang ban khanglad ïa ka liang pyrshah. Ka kol kaba ar ka la jia namar ka jingbakla jong u Franklin. Hadien ba une u nongap kol u la ïoh kem ïa ka bol bad u la kwah ban pashat ïa ka bol sha la u jong u paralok hynrei u la kum leit kawang beit beit sha ka jaka ba don u Jefferson, uba la shim ïa kane ka kabu ksiar ban pynkhih jlang ïa ka kol kaba lai.
Nangta u Wallamsuk u la pynkhihjar da ka kjat kadiang shuwa ba u Himanshu un thep ïa ka kol katba u dang mareh artad ban pyllait lyngba ki rangap dien jong ka Malki. Ka la don biang sa kawei ka kol ha kane ka jingïakhun, kaba la wan lyngba ka penalty ha ki minit pynjlan ba khatduh hadien ba u Wallamsuk u la shah pynur hapoh phyllaw kol; ïa kaba la thep da u Banshanlang Nongdhar.
Ha kane ka sngi Ba-ar (30 tarik Nailur, 2025) ka jingïakhun kan long hapdeng ka Nongrim Hills kaba don sha trai duh jong ka miej pyrshah ïa ka Langsning kaba don ha ka kyrdan ba san ha ka por 4:30 baje janmiet.
