Shillong, Nailur 04: Ka Rangdajied United ka la pynsangeh noh ïa ka jingjop ba shi lynter jong ka Nangkiew Irat da kaba ïakhaid da 1-1 kol ha ka jingïalehkai kaba itynnat bad kaba jur bha jong ka Shillong Premier League 2025 ha madan First Ground-SSA Stadium, Polo, ha ka sngi Palei.
Ka Rangdajied ka la ïoh ban lamkhmat ïa ka kylla step lyngba u Manbhakupar Iawphniaw (23′) hynrei u Wanlamsuk Nongkhlaw (66′) uba la mih bujli ha ka kylla miet u la shem ïa ka kol ban pynïakhaid na ka bynta ka Nangkiew Irat.
Ka jingïakhun ka long kaba khluit haduh katta katta, haduh ba kan da pynlong ïa u referee, u P Mawthoh, ban hap ban sei bunsien ïa ki yellow card na ka pla, ban pynshitom ïa ki nongïalehkai jong baroh arliang.
Ka jingïakhun kaba jur ha madan ka la wanrah ïa katto katne ki jingïakynad hapdeng ki rangïalehkai bad kane kam shym la kut wat hadien ba la wai, ha kaba ka jingïakynad ka la bteng biang ha kaba kut jong ka jingïalehkai. Ha kane ka khyllipmat u rephri u la sei beit sloit da ka red card ïa uwei u rangïalehkai ka Nangkiew Irat bad ïa u coach jong ka Rangdajied, kaba lah ban don ka jingktah kaba khraw ha ki jingïalehkai ban wan jong kine ki ar tylli ki kynhun.
Haba bishar ïa ka jingïalehkai, ka Rangdajied kaba la sdang ha ka rukom kaba sniew ïa ka samoi, ka la long ka kynhun kaba kham pher ha kane ka jingïakhun, ka kham stet bad ka wanrah ïa ka jingïalehkai kaba kut jingmut ban ïa mynno mynno ruh.
U Micky Marwein, u la long u rangïalehkai ba kongsan jong ka RUFC ha kane ka jingïalehkai, watla um shym la ïoh ban pynkhihjar, ha kaba u la don ka bynta kaba khraw ha ka jingïalehkai jong ka kynhun, da ka jinglah ban tehlakam bha ïa ka bol bad ka rukom pyrkhat kaba janai ban pynïaid ïa ka jingïakhun.
Ka jingtrei shitom jong u na ka liang kamon ka la pynlong ïa ka Rangdajied ban ïoh thep ïa ka kol hadien ba u la shimti ïa ka bol bad pyllait lyngba ïa u nongïalehkai ba shadien shuwa ban pashat ïa ka kol sha u Manbha ban pynkhih ïa ka jar. Kane ka kol jong u Manbha ka dei ka kol kaba 50 jong SPL 2025 ha kane ka samoi.
Haba phai sha ka kylla miet, u Wanlamsuk u la wan bujli ha jaka jong u Raikutshisha Buam, bad mar mar u la wanrah jingktah ïa ka jingïalehkai. Ka Nangkiew Irat ka la ïoh ïa ka korner, hynrei u nongap kol ka RUFC u Kerichard L Marshillong, u la ïoh ban kura pynkiar sharud ïa ka bol. Hadien nangta u Edyvenson Dhar u la pashat biang ïa ka bol hapoh phyllaw kol bad u nongap kol u la khanglad hynrei um shym la lah ban bat ïa ka bol, kaba la ailad ïa u Wanlamsuk ban pyndei tiak da ka kjat ban pynrung ïa ka bol sha kol ban pynïakhaid ïa ka jingïalehkai.
Watla katta ruh ka Nangkiew Irat ka dang sah khlem shah rem ha kane samoi kaba lah ban long kaba bha tam na ka bynta jong ka hynrei ka jingjop kaba shi lynter kan kut noh hadien 4 tylli ki jingïalehkai. Ka dang ïaineh ha khlieh duh ha ka miej da kaba kamai 10 poiñ na ki saw tylli ki jingïalehkai, katba ka Rangdajied ka la kiew na ka kyrdan kaba hynriew sha ka kyrdan kaba saw bad mynta ka la ïoh 5 poiñ naki saw tylli ki jingïalehkai.
Ka jingïalehkai ha kane ka sngi Thohdieng yn sakhi ïa ka Sawmer kaba wan kyrdan ba phra kan ïakhun pyrshah ïa ka Langsning kaba wan kyrdan ba san ha ka por 4 shiteng janmiet.
