SPL 2025: Pynkut ka Langsning ïa ka jingïalehkai da ka jingjop

Shillong, Risaw 14: Ka Langsning ka la pynkut ïa ka jingïakhun jong ka ha ka Shillong Premier League 2025 da ka jingjop kaba shongkun haduh 5-0 kol pyrshah ïa ka Malki ha ka janmiet jong ka sngi Ba-ar (14 tarik Risaw) ha madan First Ground-SSA Stadium, Polo.
Ki rangïalehkai ka Langsning kiba la pynkhihjar ha kane ka jingïakhun ki long u Samuel Phawa (35’, 40’), u Donlad Diengdoh (74’) bad u Nelson Rymbai (84’), bad ka la don ruh ka kol kaba la bakla thep hi da u rangïalehkai ka liang pyrshah, u Pynkhlainbok Wahlang (90’+4) kaba la jia thik shuwa ban kut ka minit pynjlan.
Ka Langsning ka dei ka kynhun kaba nyngkong eh ban pyndep lut ïa baroh ki jingïalehkai jong ka bad ka la pynkut ryngkat ki 20 poiñ da kaba jop 6 sien, ïakhaid arsien bad shah rem tang shisien. Watla ka la wanphai biang ha khlieh duh jong ka miej kamai poiñ, hynrei ka Shillong Lajong (18 poiñ) kaba bat ïa ka nam lahduh, ka dang don sa kawei ka jingïalehkai ban ïakhun, katba ka Mawlai (15 poiñ) ka dang don sa ar tylli ki jingïakhun. Katba ka Malki ka dang bat ïa kawei na ki kyrdan ban shah sloit, ha ka kyrdan ba khyndai, da kaba ïoh tang 6 poiñ bad ka dang sah sa kawei ka jingïakhun ban ïalehkai.
Wat lada ka Langsning kam ïoh ïa ka nam lahduh kaba ki angnud, hynrei la thikna ba kan pyndep ha ka thup kyrdan jong ki lai tylli ki kynhun ba kynsai tam (Top 3), ka aïom lehkai kaba bha haba nujor ïa kyrdan kaba hynriew ha ka SPL 2024.
Lah ban ong ba na ka bynta ka Langsning, kam shym la don satia kano kano ka jingartatien ban khur ïa ka jingjop ha kane ka jingïalehkai, haba bishar ïa ka jingtlot jong ka Malki haba ka ïakynduh pyrshah ïa ki kynhun ba kham khlaiñ ha kane ka samoi.
Watla katta ruh, ka la shim por palat shiteng kynta ïa ka Langsning ba kan thep ïa ka kol kaba nyngkong lyngba u Samuel. Nangta u la pynjlan ar shah ïa ka kol lamkhmat da 2-0 kol hadien san minit.
Da kaba lamkhmat 2-0 kol shuwa ban jam sha ka por shongthait, ka Langsning ka la pynneh ïa ka rekod kaba paka jong ka ha ka kylla step – ha kaba kam pat shah thep wat tang kawei ka kol hapoh ki 45 minit ba nyngkong jong kano kano ka jingïalehkai SPL mynta ka samoi.
Ka la shim ruh katto katne por shuwa ba ka Langsning kan ïoh ban pynkhih ïa ka kol kaba lai, ha kaba ka jingpyrshang jong u Nelson ka la shah kyntait ha u nongap kol jong ka Malki u Franklin Surong ha ka minit kaba 63, nangta u Donlad uba la shem ïalade ha ka offside bad ka kol jong u Nelson kaba la shah kyntait ha ka minit kaba 70.
Hadien kane ka Malki ka la ïoh ban pyrshang ar tylli ki kabu hynrei u nongap kol ka Langsning u Rajat Paul Lyngdoh u la lah ban tehlakam ïa baroh ar, bad u la lah ban pynkut ïa ka jingïalehkai khlem da shah thep, bad ban ïoh ïa ka clean sheet kaba saw jong u ha kane ka samoi.
U Apborlang Kurbah u la don bynta ha baroh ar tylli ki kol kiba hadien da ki bol pashat ba thikna jong u na ka liang kamon, ïa kaba la thep da u Donlad bad u Nelson. Shuwa ban kut ka minit pynjlan ba khatduh, u Pynkhlainbok u la kum thep ïa ka bol sha kol lade ha ka jingpyrshang ban pynkiar sharud ïa ka bol na u laiñ.
Ha kane ka sngi Balang, ka Laitkor kaba wan ha ka kyrdan kaba phra kan aireng pyrshah ïa ka Sawmer kaba wan ha ka kyrdan kaba hynriew ha ka por 4 shiteng janmiet. Ka Laitkor ka donkam ïa ka jingjop ha kaei kaban long ka jingïakhun kaba khatduh jong ka ban pynthikna ba ka Malki kan nym lah ban tam ïa ka ha ka thup kyrdan. Katba ka Sawmer kan kiew sha ka kyrdan kaba san lada ka jop bad ka dang don sa kawei ka jingïalehkai ban ïakhun.