SPL 2025: Pyllait u Mebannangkiew ïa ka Lajong na ka nam rem, ïakhaid mar 2 kol bad ka Langsning

Shillong, Nailur 13: Ka Langsning ka la sah tang da ki sekhon ban khur ïa ka jingjop kaba kongsan pyrshah ïa ka Shillong Lajong bad ruh ban kiew sha ka kyrdan ba nyngkong ha ka Shillong Premier League 2025, hynrei ka Lajong ka la pynpulom ïa kane da kaba pynkhihjar hapoh ki hynriew minit jong ka por pynjlan ïa ka kylla miet shuwa ban kut ban pynïakhaid ïa ka jingïakhun da 2-2 kol ha madan SSA Stadium ha First Ground, Polo, ha ka sngi Saitjaiñ.
Baroh arliang kin jin da la kiew sha ka kyrdan ba ha khlieh duh lada ki la jop ïa kane ka jingïalehkai bad ha kiba bun ki bynta jong ka jingïakhun la i kumba kata ka kynhun kan dei ka Langsning, kaba la pynkhihjar dang kloi lyngba u Dajiedlang Wanshnong (5’) shuwa ba u Nikelson Bina un pynjlan ar shah ïa ka kol lamkhmat ha ka minit kaba 57.
Hynrei ka SLFC ka la pynphai shi kol lyngba u Riborlang L Lyngkhoi (62’) bad nangta ka la wan ka kol pynïakhaid ha ki minit pynjlan shuwa ban wai lyngba u Mebannangkiew Thabah (90’+6).
Kumta da kane ka resol, ki kyrdan jong ki kynhun ha ka miej kim shym la don jingktah eiei, ha kaba ka Lajong ka la sah ha ka kyrdan kaba lai (mynta ka la ïoh 9 point) bad ka Langsning ka sah ha ka kyrdan kaba saw (8 point). Ka Lajong ka ïaryngkat bad ka Mawlai hynrei ka Mawlai ka kham bun kol (12 la 10); katba ka jingiapher kol jong ki ka long kaba ïaryngkat da mar +7.
Ka Langsning ka la sdang ñion ïa ka liang pyrshah da kaba tyngeh bad kham kham kloi mar ïa sdang bad ka jingpyrshang jong ki ka la seisoh tang ha ka minit kaba san. Kane ka la wan hadien ba u Dajiedlang u la ïoh ban knieh ïa ka bol na u rangïalehkai dien u Ronald Kharkongor, shuwa ban thep lyngba u nongapkol ka Lajong u Lakpa Lama, kaba la pynlong ïa ka kynhun ban lamkhmat da 1-0 kol ha ka kylla step.
Ka Langsning ka la wanphai biang da kaba tyngeh ha ka kylla miet bad ka la ïoh ïa ka kol kaba ar shuwa ban kynjoh 1 kynta. U Nikelson, uba la mih bujli tang katto katne minit, u la thep na ka corner kick.
Da kitei ki ar kol ka Langsning ka la dei ban kham pynjai jai ïa ka jingïalehkai bad ban tehlakam ïa ka bol katba lah hynrei ka la shem ïalade ba ka hap ban kthong ïa ka Lajong namar kane ka kynhun kaba bat ïa ka nam lahduh ka la ïai bteng ban tur shakhmat na ka por sha ka por.
Ka jingbakla ha ka liang ki rangapdien ka la pynlong ïa ka bol ban leit sha u Deibormame hynrei um shym la ïohlad ban pyrshang shut ïa ka bol. Hynrei kane kam shym la ktah satia, namar ba u Riborlang u la khyrwit da kaba tyngeh ïa ka bol na shabar ka phyllaw kol kaba la ïaid lait na u rangapkol ka Langsning u Rajat Paul.
Ka Langsning ka la bat skhem ïa ka kol lamkhmat kaba la shah pynduna bad ka la jan khur pura ïa ki 3 poiñ hynrei ka free kick ha ki minit pynjlan shuwa ban kut ka la pynpulom noh ïa ka jingkhmihlynti jong ki. Ka bol ka la hap ha ka jaka kaba thylli hajan ka kol, ha kaba ka Langsning kam shym la lah ban pyllait ïa ka bol na ka jingma. Ha kaba nyngkong ka Lajong kam shym la lah ban thep kol. Hynrei ha kaba khatduh u Mebannangkiew u la ïoh ban pyndei tiak ïa ka bol ban phah ïa ka sha kol.
Ha kane ka sngi Nyngkong ka Mawlai kan ïakhun pyrshah ïa ka Mylliem ha ka por 4:30 janmiet.