Shillong, Nailar 13: Ka Malki ka la ïoh ban khur pura ïa ki 3 point ha ka jingïalehkai ba nyngkong ba ka la wanphai biang ha ka lympung Shillong Premier League da kaba pynliem ïa ka Laitkor kaba la shah pynduna sha ka 10 ngut ki rangïalehkai da 1-0 kol hynne ka sngi Balang ha madan First Ground-SSA Stadium, Polo.
U Fashioning Syngkli u la thep ïa ka kol hapoh 45 sekhon mar ïa sdang ïa ka jingïalehkai da kaba pyndei tiak ïa ka bol pashat ba la wan na liang kamon.
Ka dei ka jingsdang kaba sniew ïa ka Laitkor bad ka la nang jur shuh hadien ba u Felixdarren Suting u la shah beh noh shi syndon namar ka red card hadien ba u la pynur ïa u rangïalehkai ka Malki ban khanglad ïa ka kabu ba paka ban pynkhihjar.
Hynrei ïa ka nam rangïalehkai ba kynsai ka dei ban leit sha u nongap kol ka Malki u Franklyn Surong, uba la lah ban ïada bun tylli ki jingpyrshang thep kol kiba paka ha baroh kawei ka jingïalehkai khamtam ha ka kylla miet.
Ka kabu ba bha tam jong ka Laitkor ka la wan lyngba ka penalty kaba la ai sha ka hadien ba u Samborwell Mynsong u la shah pynur hapoh phyllaw kol ha ka minit kaba 58. U Euvasius Mawthoh u la wan shakhmat ban shut ïa ka penalty hynrei u Franklyn u la sei madan ïa sap ba kyrpang ban kerda bad pynkiar ïa ka bol sha jngai.
Watla kata ruh, ka jingtrei shitom jong u Franklyn kam shym la kut satia, ha kaba u la khanglad ruh ïa ka jingpyrshang kaba tyngeh kaba la shut da u Sanky Kharkongor ha ka minit kaba 79. Ha kaba kut jong ka jingïalehkai u la khanglad ïa ka jingpyrshang ba thikna jong u Freelyson Tariang bad nangta u la kyntaid ruh ïa ka jingpyrshang na jan kol jong u Samborwell ha ki minit pynjlan shuwa ban kut.
Lah ban kdew ba ka Laitkor ka la kyntiew ïa ka jingïalehkai jong ka ha ka kylla miet watla ka kynhun ka la shah pynduna sha ka 10 ngut hynrei kam shym la lah ban shem ïa ki lad kiba paka ban thep kol namar ka jingtbit u rangap kol ka liang pyrshah.
Ka Laitkor ka la pyndep ha ka kyrdan kaba san ha ka samoi ïalehkai ba nyngkong jong ka ha ka SPL ha u snem 2024, katba ka Malki ka dang wanphai biang sha ka kyrdan ba ha khlieh duh hadien ba ka la don ha ka First Division ha kine ki ar snem ba la dep.
Ka jingïakhun SPL ban wan kan long ha ka 18 tarik Nailar hapdeng ka Rangdajied United pyrshah ïa ka kynhun ba bat ïa ka nam lahduh ka Shillong Lajong ha ka por 5:30 janmiet. Kane ka jingïalehkai la buh ban long ha ka 9 tarik u Naiwieng hynrei la hap ban pynkynriah noh namar ka jingïalehkai Durand Cup kaba dang ïaid shakhmat.
