Shillong, Nailur 24: Ka Malki ka la khur ïa ka jingjop da 1-0 kol pyrshah ïa ka kynhun kaba wan ha trai duh jong ka miej, ka Nongrim Hills, ha ka jingïalehkai jong ka lympung Shillong Premier League 2025 ha madan First Ground-SSA Stadium, Polo, ha ka sngi Balang.
U Ribanshan Marpna u la pynkhih ïa ka namtam ha kane ka jingïalehkai ïa kaba u la thep ha ka minit kaba 68. Kane ka jingjop ka la pyllait ïa ka Malki na ka thup kyrdan shah sloit (relegation zone) bad ban kiew sha ka kyrdan ba hynriew ha ka miej kamai poiñ.
Kane ka dei ka jingïalehkai kaba khatduh ban pyndep ïa ka kylla kaba san (Round 5). Ha ka jingshisha kane ka jingïakhun la buh ban pyndep ha ka 12 tarik u Nailur hynrei la hap ban pynsangeh noh namar ka jingjur palat u slap bad ka jinglang um jong ka madan ha katei ka sngi.
Kane ka dei ruh ka jingïalehkai kaba nyngkong eh jong ka SPL hadien ka jingsangeh kaba la palat shi taïew. Baroh ar liang kim shym la lah satia ban pynurlong ïa ki lad ki lynti ba ki la thaw bad ban pynkylla ïa ki sha ki jingpyrshang kiba paka ban thep kol.
Kine ki jingeh ba baroh arliang ki la ïakynduh ka la pynlong ïa ka kol jong u Ribanshan kaba kongsan, hadien ba u la pyrshang thep ïa bol na shapoh ka phyllaw kol, kaba la ïaid lait na u rangap kol jong ka Nongrim Hills u Ebenson Warbah.
Ka jingshah lamkhmat ka la pynlong ïa ka Nongrim Hills ban ïakhun tyngeh ban ïoh pynïakhaid hynrei kam shym la lah satia ban ïoh ïa ka kol kaba ki angnud. Ha kaba kut ka la mad ïa ka nam rem ha ka sien kaba saw ha ki san sien ïakhun, ha kaba ka poiñ ba ki la kamai ha kane ka samoi ba mynta jong ka SPL ka dei tang ka jingïakhaid kaba mar 2-2 kol bad ka Laitkor.
Ka jingjop ka la pynlong ïa ka Malki ban kiew lai kyrdan ha ka miej kamai poiñ. Ka la pynliem noh ïa ka Laitkor da 1-0 ha ka jingïakhun ba nyngkong jong ka samoi ïalehkai jong ka hynrei ka la shah rem lai sien lynter shuwa ban jop biang pyrshah ïa ka Nongrim Hills hynne ka sngi Balang. Ka ïaryngkat bad ka Sawmer mar 6 point hynrei ka don ka jingïapher kol kaba kham bha (-10 la -11).
Kane ka jingjop jong ka Malki ka la pynhap ruh ïa ka Rangdajied United sha ka kyrdan ba khyndai bad sha ka thup kyrdan shah sloit (relegation zone). Ka Mylliem bad ka Rangdajied baroh ar tylli ki kamai 5 poiñ hynrei ka Mylliem ka wan hakhmat katkum ka jingïapher kol (-3 la -4).
Ha kane ka sngi Palei ka Laitkor kaba wan kyrdan ba san, kan ïakhun pyrshah ïa ka Rangdajied ha ka por 3:30 baje janmiet.
