Shillong, Nailar 18: Ka jingïakhun hapdeng ka Rangdajied United bad ka kynhun ba bat ïa ka nam lahduh ka Shillong Lajong ha ka lympung ïalehkai jong ka Shillong Premier League 2025 ha madan First Ground-SSA Stadium, Polo, hynne ka sngi Nyngkong ka la kut ha ka jingïakhaid khlem don ba lah ban pynkhihjar.
Ka rukom ïalehkai ka long kaba ïaid stet, naduh kaba sdang haduh kaba kut, kaba dei ka rukom ïalehkai kaba kyrpang kaba baroh ar tylli ki klob ki wanrah ha madan. Baroh arliang mamla ki long kiba khlaiñ bor hynrei kim shym la lah ban pynseisoh ïa ki lad ki lynti kiba kawei pa kawei ka kynhun ka la ïoh bad kumta ki la hap ban ïasam mar shi point. Kane ka dei ka jingïakhaid kaba ar jong kane ka samoi bad ka jingïakhun kaba nyngkong kaba khlem don ba lah pynkhihjar.
Haba phaidien, ka Lajong ka la pynliem ar sien ïa ka Rangdajied ha ka SPL jong u snem 2024 bad ha kiwei pat ki lympung ha une u snem ba la dep, kum ka Meghalaya State League bad ka Durand Cup.
Hynrei mynta ka sngi, baroh arliang ki la durut doh ïap ban ïoh thep kol hadien ba ki la ïaid lyngba bun ki jingpynkylla ïa ki rangïalehkai shuwa ban sdang ka samoi ïalehkai kaba thymmai. Ka Lajong ka la duh noh ïa u nongthep kol ba bun tam jong ka SPL 2024, u Deibormame Tongper bad kiwei kiwei ki nongïalehkai kiba tbit bha kum u Yohaan Benjamin bad u Babysunday Marngar, katba ka Rangdajied ka la donkam eh ïa ka jinglah ban thep kol jong u Owanijuh Pajuh.
Kane kam mut ba ym shym la don ki kabu thep kol ha kane ka jingïalehkai, ha kaba ka Lajong ka la sepei ar tylli ki jingpyrshang thep kol kiba la shu pynsmiej ïa u dieng kol. U Manbhakupar Iawphniaw u la ïoh ïa ka free-kick na ka bynta ka Rangdajied kaba la jan rung sa khyndiat bad hadien katto katne minit ha ka kylla miet u la shah khanglad ha u rangapkol ka SLFC u Wanteilang Malngiang, uba hadien kata u la hap ban sei ïa ka sap ba kyrpang jong u ban kyntait ïa u Menangpyndap Khongjee. Ka Lajong ruh ka la duh ïa ka kabu thep kol kaba paka kiba la wan lyngba u Firstborn Khongsit bad u Ricky Kharkongor hynrei kim shym la lah ban pynïaid ïa ka bol sha ka jaka kaba la thmu.
Kane ka jingïakhun ka dei ka jingïalehkai kaba khatduh jong ka wat kaba nyngkong (first round) bad hadien san tylli ki jingïalehkai ki don lai tylli ki kynhun kiba khur mar 3 poiñ – ka Mawlai, ka Nangkiew Irat bad ka Malki. Ki saw tylli kiwei pat ki kynhun ki la ïoh mar 1 poiñ kata ka Langsning, ka Mylliem, ka Rangdajied bad ka Lajong- katba ka Nongrim Hills, ka Sawmer bad ka Laitkor ki dang sah thylli naba shah rem.
Ka jingïakhun jong ka SPL 2025 kan wanphai biang ha ka sngi Balang hapdeng ka Nongrim Hills pyrshah ïa ka Sawmer ha ka por 4 shiteng janmiet. Baroh arliang ki la shah rem ha ki jingïakhun ba nyngkong jong ki bad kin donkam ban pynkhie biang khnang ban kyntiew ïa ka jingïalehkai jong ki ha ka lynti kaba dei.
