Shillong, Nailar 28: Katba ki jingïakhun jong ka lympung Shillong Premier League jong ka Shillong Sports Association ka la nang ïaid shakhmat, ka Nangkiew Irat, ka la nang pynskhem ïalade ban poi sha ka thong ban ïaknieh ïa ka nam kum ka lahduh da kaba jop lai sien lynter ki jingïalehkai.
Ka Nangkiew Irat ka la pynpaw ïa ki dak ki shin ba ka thrang ban ïohrah ïa ka nam kum ka lahduh da ka rukom ïalehkai kaba khlaiñ, hadien ba ka la lah ba kan pynjemkhnap ïa ka Sawmer SC da 5-1 hynne ha ka jingïakhun kaba la long ha ka janmiet sngi Palei.
Ki namtam ha kane ka kynti na ka bynta ka Nangkiew Irat ki long u Himanshu Patil (15’, 42’) bad u Ronaldkydon L Nonglait (46’, 50’) da kaba pynkhihjar mar ar sien, katba ka shi kol la thep da u Banshanlang Nongdhar (48’). Ka Sawmer ka la pynphai shi kol lyngba u Bisharlang Mawthoh (18’).
Da kaba jop lai sien lynter ki jingïalehkai ka Nangkiew Irat ka la ïoh ban kamai mynta 9 point bad pynskhem ïa ka kyrdan jong ka ha khlieh duh jong ka miej, katba na ka liang ka Sawmer kane ka namrem ka pynlong ïa ka ba kan hiar pat sha ka kyrdan kaba 7.
Ka kol kaba nyngkong kaba la thep da ka Nangkiew Irat lyngba u Himanshu kadei kaba u la ïoh ban rah shakhmat ïa ka bol ha kaba u la sah satang para marwei bad u rang ap kol ka Sawmer u Pyrshangbanbha Dkhar.
Ka kol lamkhmat jong ka Nangkiew Irat kam shym la neh slem namar ba ka Sawmer ka la jubab da kaba pynïakhaid. Ka jingïatreilang jong u Dibinroy Nongspung uba la pashat ïa ka bol sha u Bisharlang bad kumba 6 yard na ka kol, dain u la khyrwit ban pynkhih ïa ka jar na bynta ka Sawmer.
Hadien kane, ka Sawmer ka la pyrshang katba lah ban pynneh ïa ka sur ïalehkai jong ka, hynrei u Himanshu sa shisien u la ïoh ïa ka kabu ksiar ban thep pat ïa ka kol kaba ar, na ka bol ba la pynbuh sha u da u Edyvenson Dhar ban lamkhmat ïa ka kylla step da 2-1.
Mar ïasdang ka kylla miet, ki rangïalehkai ka Nangkiew Irat ki la lap ba ïoh thep syndet haduh lai tylli ki kol tang hapdeng san minit, kaba hangne ka la khang lad ïa ka kynhun ïalehkai ka Sawmer ban lah ban wanphai biang sha ka lynti jong ka jingïakhun bad haduh kaba kut ban hap ban pdiang ïa ka namrem.
Ka jingïakhun ha kane ka sngi Thohdieng kan dei ka jingïalehkai kaba jur bha lane ka Super Friday Match, namar katkum ka prokram kaba la pynbeit, ka jingïakhun kan long hapdeng ki artylli ki kynhun ba khraw ha kane ka lympung ha kaba ka Mawlai SC kan ïakhun pyrshah ïa ka Langsning FC, ha ka por 4 shiteng nohphai sngi.
