Shillong, nailur 01: Ka Rangdajied United ka la khur ïa ka jingjop da ka said da kaba pynliem ïa ka Nongrim Hills da 1-0 kol ha kawei na ki jingïakhun jong ka lympung ïalehkai Shillong Premier League 2025 ha madan First Ground-SSA Stadium, Polo, ha ka janmiet jong ka Sngi Nyngkong.
Ka kol ba la thep hi da u rangïalehkai ka liang pyrshah, u Shanborlang Thangkhiew ha ka minit kaba 74 ka la pynlong ïa ka Rangdajied ban khur ei ïa ki 3 poiñ na kane ka jingïakhun kaba la sakhi ïa baroh arliang mamla kiba la trei shitom haduh kaba kut jong ka 90 minit ban thaw ïa ki lad ki lynti da kumno ban pynkhihjar.
Baroh ar tylli ki kynhun kim pat shym la jop shuwa kane ka jingïakhun – Ka Rangdajied ka la kamai shi poiñ na ka jingïakhaid (0-0) ha ka jingïalehkai ba sdang jong ka pyrshah ïa ka Shillong Lajong kaba bat ïa ka nam lahduh, nangta ka la shah rem noh ha ka Langsning da 4-0 kol.
Ka kol kaba nyngkong jong ka Rangdajied mynta ka samoi ka la urlong hadien ka bol pashat jong u Bantiplang Khongnoh kaba la pynrung hapoh phyllaw kol, ha kaba u Shanborlang u la hap ban ïada ïa ka bol na u Manbhalang Iawphniaw ka Rangdajied, hynrei khlem da thmu u la kum bakla thep hi ïa ka bol ha la ka jong ka kol.
Kane ka jingjop ka la kyntiew ïa ka RUFC na ka kyrdan ba khyndai sha ka kyrdan ba san bad mynta ka la kamai 4 poiñ. Na ka liang ka Nongrim Hills pat ka don hapdeng ka jingma namar ba ka la shah rem ha baroh lai tylli ki jingïakhun haduh mynta bad ka don ha trai duh jong ka miej kamai poiñ.
Ka jingïalehkai jong ka Shillong Premier League ha kane ka sngi Ba ar yn sakhi ïa ka Shillong Lajong ka ban aireng pyrshah ïa ka Laitkor ha ka por 4:30 baje nohphai sngi. Ka Lajong ka lah ban kiew sha ka kyrdan ba ar lada jia ba ka jop, katba ka Laitkor – kaba don ha ka kyrdan ba saw jong ka miej – lada ka lah ban jop ïa kane ka jingïalehkai ka lah ban jam sha ka thup kyrdan Top-3 ha ka miej kamai point.
