SPL 2023: Mar shi kol ïakhaid ka Mawlai SC bad ka Ryntih SC

Shillong, Lber 23: Ka jingïalehkai hapdeng ar tylli ki kynhun na Mawlai ha ka lympung Shillong Premier League 2023 kaba hynnin ka Sngi Saitjaiñ ka la kut ha ka jingïakhaid, ha kaba baroh ar, ka Mawlai SC bad ka Ryntih SC ki la ïoh ban thep mar kawei haduh kaba kut jong ka por.
Ha ka jingïakhun dei ka Mawlai SC kaba la ïoh ban pynkhihjar nyngkong lyngba ka kol na u Khrawkupar Jana ha ka minit kaba 46 tang mar ïa sdang ka kylla miet, hynrei ka Ryntih SC ka la ïoh ban pynïakhaid lyngba u Yami Longvah ha ka 66 minit.
Lah ban kdew ruh ba ka lahduh jong ka samoi ba ladep, ka Mawlai SC ka la duh ïa shibun ki kabu kiba kam shym la lah ban pynurlong, katba ka Ryntih ka la duh ïa ar tylli ki kol ba la thep kiba shah rai offside.
Watla kata ruh, baroh arliang ki la ïakhun tyngeh bad sei la ki jong ki sap ki phong ha kane ka jingïakhun hynrei tad haduh kaba kut jong ka 90 minit ym shym la don ba lah ban pynïakhlad ïa ka jingïakhaid.
Ka jingïalehkai mynta ka sngi kan long hapdeng ka Nangkiew Irat SC pyrshah ïa ka Nongthymmai SC ha ka por 3 baje nohphaisngi. Kumban shu pynkynmaw, ka Nangkiew Irat ka la jop ïa ka jingïakhun kaba nyngkong, katba ka Nongthymmai ka la mad namrem ha ka sngi sdang ïa kane ka samoi ba mynta ka SPL.