New Delhi, Nailar 16: Ha ka rai ka ban ktah ïa ka lawei bad kumjuh ruh kaban pynlehraiñ ïa ka jingïalehkai Phutbol ha ri India, ka FIFA ha ka sngi ba ar, ka la sospon noh ïa ka India ha ka liang ka jingïalehkai bad kane ka jingshah sospon jong ka India kan pynduh noh ruh ïa ka hok jong ka India ban long kum ka nongpdiang ban pynlong ïa ka Under- 17 Women’s Word Cup 2022. Ha ka jingshisha ka India kadie ban pdiang ïa kane la lympung ïalehkai jong ki samla kynthei kiba hapoh 17 snem, kaba la buh ban pynlong naduh ka 11 haduh ka 30 tarik u Risaw mynta ka snem.
Kane kadei ka sien kaba nyngkong eh ba ka India kan shah sospon ha ki bor pyniaid Phutbol ba ha khlieh duh jong ka pyrthei naduh ba ka FIFA ka la ithuh ïa ka All India Football Federation (AIFF) myn 85 snem mynshuwa.
Ka jingsospon ka FIFA ïa ka India kadei namar ba ki don kiwei pat ki bor kiba nabar kiba tuklar ïa ka jingïalehkai Phutbol ha kane ka ri.
“Ka Bureau jong ka FIFA Council ka la rai da kawei ka jingmut ban sospon ïa ka All India Football Federation (AIFF) naduh mynta ka sngi namar ka jingtuklar kiwei pat ki bor ki bym don jingïasnoh bad ka jingïalehkai Phutbol, kaba long ka jingpynkheiñ ïa ki kyndon treikam jong ka FIFA”, la ong ka khubor ba la pyllait da ka FIFA haka sngi ba ar.
Shuh shuh ka kyrwoh na ka FIFA ka ong ba ïa kane ka jingsospon lah ban weng tang lada la weng noh ïa ka hukum kaba kaba la thaw ïa ka Committee of Administrators ban pynïaid ïa ka jingïalehkai Phutbol bad ba ka AIFF kan ïoh biang ïa ka bor ban pynïaid ïa ka jingïalehkai Phutbol ha ri India.
Ka FIFA ka ong ba ha kaba ïadei bad ka Under- 17 Women’s World Cup, ka FIFA ka ong ba ym lah da lei lei ban pynlong ha India katba ka suspension ka dang don bad ïa kane ka rynsan ïalehkai yn sa phah biang sha ka Bureau of the Council ba kan peit lada donkam.
Ki dak ki shin jong kane ka jingshah sospon ka India ki la paw naduh naduh kine ki bnai, hadien ba ka Supreme Court ka la weng ïa u Praful Patel kum u President ka AIFF ha ka 18 tarik u Jymmang mynta ka snem, namar ba ka AIFF kam shym la pynlong elekshon ban jied ïa ki Nongkitkam ïa kaba la dei ban pynlong naduh u bnai Nohprah jong ka nsem 2020.
Ka Supreme Court ka la thung ïa ka kynhun ba 3 ngut ki dkhot ki ban pynlong ïa ka Committee of Administrators (CoA), kaba la khlieh da u Nongbishar ba la shong thait, u AR Dave, ban pynïaid ïa ki kam jong ka Federation.
Ki arngut kiwei pat ki dkhot ka CoA, ki long u Chief Election Commissioner barim ka India u SY Quraishi bad u Kapten barim ka team Phutbol ka India, u Bhaskar Ganguly.
Kane ka jingshah sospon ka bor pynïaid Phutbol ha ka ri, ka la wanrah ka jingsngewsih kaba jur na kiba bun ki nongïalehkai Phubol kiba rim bad kiba mynta jong ka ri India. Kiba bun ki la pynpaw ba kane kan long ka jingduhnong kaba khraw ïa ka ri India.
Ka jingshah sospon kumno kan ktah:
Ka jingktah kaba nyngkong ka long ïa ka Under -17 Women’s World Cup, bad ym tip la ka India kan ïoh lad ne em ban ïashim bynta lada pynlong ha kiwei pat ki ri. Ka India ha ka jingshisha kadei kawei na ki team ban ïakhun ha kane ka Tournament namar ka trai ba pdiang. Hynrei lada long shawei pat ym tip la ka India kan ïoh lad ne em ban ïakhun.
Kawei pat ka jingktah ka long ba ka India kala buh ban ïalehkai paralok bad ka Singapore bad Vietnam ha kine ki bnai ban wan. Hynrei ym thikna shuh ba kan dang ïoh lad, namar ka FIFA ka ong ba kano kano ka ri kaba shah sospon kam lah ban ïalehkai Phubtol bad kiwei pat ki ri.
Kawei pat ka long ba ki Club na ka ri ba shah sospon kim lah ban dang ïalehkai ha ki International Tournament bad ki Club kim lah shuh ban soi nongïalehkai thymmai, lait noh kito kiba la don lypa kiba la buh katkum ka bhah ba la pynbeit da ka AIFF. Kumta ka ATK Mohun Bagan kaba dei ban ïalehkai ha ka AFC Cup naduh ka 7 tarik u bnai ban wan kan nym ïoh lad ban ïashim bynta katba ka suspension ka dang neh.
Ha ka liang ki Kynthei pat, ka Gokulam Kerala FC kan nym lah ban ïashim bynta ha ka AFC Women’s Club Championship ha kane ka taïew ban wan bad ka team jong ki Kynthei jong ka ri kan nym lah ban ïashim bynta ha ka SAFF Women’s Championship ka ban long naduh u bnai ban wan. Nangta ki kyndon ka FIFA ki ong ruh ba lada ka ri ka shah sospon, kino kini ki tournament kiban pynïalehkai ha kane ka ri, kin nym ïoh jingithuh satia na ki bor kiba halor, kata la ka long na ka Asian Football Confederation ne na ka FIFA ruh.
Hynrei hapdeng kine ki jingjia, ka don ka jingkyrmen pat namarba ka AIFF ka la ïakren bad ka Ministry of Youth Affairs and Sports ban ïapynbeit ïa kane ka kam.
