Shillong, Nailar 16 : Ka Meghalaya Pradesh Congress Committee (MPCC) ka la rai ban sospon mardor ïa 2 ngut ki MLA jong ka party namar ka jingsuba ba ki don jingïadei kaba ïajan bad ka Sorkar Meghalaya Democratic Alliance (MDA) ba ïalam da ka National People’s Party (NPP). Ka Congress ka kynnoh ruh ba ka NPP ka pyndonkam da ka pisa ba ka lum beaiñ na u drok, na ka kam tih dewiong beaiñ, na ki kam kontrak ban pynduh pyndam ïa kiwei pat ki party ne ki seng saiñ pyrthei.
Kine ki arngut ki MLA ka party ki dei u MLA ka Nongstoin Bah Gabriel Wahlang bad u MLA ka Mawhati Bah Charles Marngar. ïa kane ka rai la pynpaw pyrthei tang hadien katto katne kynta ba ka MPCC ka la ïa kynduh lang hangne ha nongbah Shillong.
Kat kum ka shithi bala phah da ka General Secretary ka MPCC Kong Wansuk Syiem sha kine ki arngut ki MLA ka ong “ Kumba la bthah ïa nga da ki bor ba halor, la pyntip sha phi (Gabriel/Charles) ba phi la shah sospon na ka Indian National Congress naduh mynta ka sngi ka 16 tarik Nailar, ka ban treikam haduh 6 snem tad haduh da pyntip da kumwei pat na ki daw jong ki kam pyrshah party jongphi.
Ka Kong Wansuk ka la pyntip ba kane ka rai ka dei kaba la shim halor ki jingpyntip na ki Block Committee bad kiwei kiwei ki tnad treikam ka party, kiba pyni ïa ka jingdon jingïadei jong kine ki MLA bad ka Sorkar MDA. Kine ki jingleh ki long pyrshah ïa ki nongrim treikam jongka party bad kumta hap ban ai jingpynshitom ia phi kat kum ki kyndon ka party.
Lah ban kdew, dang shen ka kyrteng u Bah Gabriel Wahlang bad Bah Charles Marngar, ki la mih lem bad uwei u MLA jongka Umsning u Dr Celestine Lygndoh kaba kynnoh ba kine ki lah ban leit ïasoh noh sha ka seng National People’s Party (NPP) hadien ka jingrakhe ïa ka Independence Day. Hynrei namar u Dr Celestine u ïadon lang ha ka jingïalang ym shym la shim kano kano ka rai pyrshah ïa u bad la ong ba ka party kan dang bishar ïa kane ka kam kham hadien.
Lah ban kdew ba kine ki arngut ki MLA ka Congress ki dei ruh ki MDC jong ka Congress ha Khasi Hills Autonomous District Council (KHADC).
Haba ïakren bad ki lad pathai kubor, u President ka MPCC Bah Vincent H Pala ula ïathuh “Ngi la khot ïa baroh lai ngut ki MLA. Hynrei tang u Dr Celestine ula wan bad batai ïa ngi. Ula ong ba kim pat ïaleit satia mynta, ngi dang ïa pyrkhat namar ka don ka jingtyrwa na ka NPP ïa bun ki skhim kam pynroi. Kum ka nuksa, kila tyrwa ïa ki da ki Block, ki surok bad bun kiei kiei ba kin wan ïasoh bad ki hynrei ula pyntip ba kim pat shim rai satia bad na kata ka daw ula wan ban batai ïa ngi”.
Haba pynpaw ba ka don ka jingpyrshang jong ka BJP-NPP ban pynjot ïa ka Congress, u Bah Pala ula ong “Ki tip ba ka jingsngew jong u paidbah ka don bad ka Congress mynta ym tang ha ka Jylla hynrei ha ka Ri India baroh kawei. Ki pyrkhat ba da kaba shim noh ïa ki MLA bad ki, kin pynjot ïa ngi khamtam ha ka elekshon Ganbegre bad MDC”.
U pyntip ba ka party kala ai ka jingmaham kaba jur pyrshah ïa ki MLA ba kan leh da kaba tyngeh pyrshah ïa ki lada ki leit ïasoh sha kiwei pat ki party.
U Saleng A Sangma MP ka Tura u la ïathuh ba bun tylli ki block la dep kular bad la pynpaw ba la mang pisa ruh hynrei ha ka jingshisha pat ki shu kut tang ka ktien khlem jingtreikam. Ki (NPP) ki la buh bun tylli ki maw nongrim ha ri lum Garo na ka bynta ban tei bun ki skul, hospital hynrei wat ïa kiba la don lypa ruh ym shym la leh ei ei ruh kumta kumno ki pyrkhat ba kin ai ïa ki kita ki Block. U bah Ronnie V Lyngdoh uba dei u Nongïalam ka Liang Pyrshah u la ong kiba kum kine ki jingkular ki ju wan bha sha ki liang pyrshah bad ha kaba kut shah dung pynban nadien namar pyrshang ban khring bad phah pynïasoh pynban bad ki da kaba pynbiej da ki skhim bad ki Block.
U ma Pala u la ong shuh shuhba ka sorkar MDA ba ïalam da ka NPP ka pyndonkam da ka pisa beaiñ ban thied ia ki MLA ka Congress bad ïa ki MLA jong kiwei ruh ki party.
U la ong “ Kane ka sorkar ba mynta kam long kum kiwei ki sorkar kiba rim. Kane ka sorkar ka long kaba sarong ba kyreit, ba bamsap bad pyrshang ban pynjot ïa kiwei ki seng saiñ pyrthei da ka pisa beaiñ ba ki ïoh na u drok, na ki kam tih dewiong beain, na ki kam kontrak bad ter ter” u la kynnoh shuh shuh ba wat ha ki kam transfer ïa ki ophisar ruh ki dawa pisa bad da kato ka pisa ki pyrshang ban thied ïakiwei ki MLA. “ Kumta nga kyntu ïa ki para dkhot ne MLA wat ngop ha ki jingshah pynbiej kumba phi la ïohi kaei kaba la dep jia ba 17 ngut ki MLA ki laphet na ka Congress bad mynta katno ngut ki la wan phai biang. 70 % na ki ki la rem ïa ka election. Lada ki leit pynïasoh kam don jingmyntoi ïa ka NPP ne BJP namar na ki 60 ngut ki MLA ki la don lypa 47 ngut hynrei ki leh tang ban pynjah burom ïa ka Congress” ong u ma Pala.
U la ong ba ka Congress ka ai ka jingmaham ba tyngeh ïa ki MLA ba kan leh da kaba tyngeh lada ki leit pynïasoh sha ka NPP, “ Ngi ruh ngin leh ïa ka kam bad ngim map ïano ïano ruh. Ngin leh da kaba tyngeh khlem jingmap khnang ba kin tip ba ka Congress kam dei ka party kaba jem ne U President um shym la shim rai namar ba u don sha US namar ka khun ka treikam ha US. Nga leit shatei tang ban leit jngoh ïa ka ban pynbiang ïa ka jaka sah jongka nadong shadong”
“ Ngim ju shim rai tang namar ba ïohi ha ki kot khubor hynrei mynta ngi la ïoh ïa ki kaiphod na ki Block. Ngi la khot ïa ki,. ïa u nongïalam ka Liang Pyrshah, ïa u MP ban ïoh sngew na ki, ym dei ba ngi long niang kohnguh beit ha ka party hynrei ngi kwah ban ïoh sngew na ki ruh kaba long kum ka jingailad ïa ki ruh ban pynpaw ne pynshai. Haduh mynta ruh ngi dang kloi beit ban ïa pynbeit ïa ka kam namar kumba ngi la dep ailad ïa ki lada ki kloi ban wan ïa kynduh ngi long kiba la kloi ban ïa kynduh hynrei lada kim kloi ngi ruh ngin leh ïa kaba donkam” ong u ma Pala.
