Shillong, Jylliew 15: Ka Hills Farmer’s Union kaba dei ka seng ba peit ïa ki nongrep ha ka sngi Balang ka la kynduh ia u Myntri ka tnad Pule Puthi ka sorkar jylla, Bah Lahkmen Rymbui ban kyntu ïa u ba ka sorkar kadei ban kyrshan lane ban plie lad lang ïa ki khun jong ki nongrep khnang ba kin lah ban ïakhun lang ïa ki ‘competitive exam’ bapher bapher.
Ka kynhun hapoh ka jingïalam jong u Bah Command Shangpliang ka la kyntu ruh ïa ka sorkar ban buh da ki prokram ai jinghikai na ka bynta kito ki samla pule kiba don ha ki secondary bad higher secondary khnang ba ki samla pule kin lah ban jied ïa ka laiñ pule kaba ki kotbor na ka bynta ka lawei jong ki.
Haba kren bad ki lad pathai khubor, u President u ong ba ki la kyrpad ruh ïa u Myntri ban don ïa ki nonghikai kiba tbit ha ki skul bad college ban leh ïa kane, nangta ban ai ïa ki library grant sha ki skul bad college ba kin lah ban thied ïa ki kot bad ki jingthoh kiba ïadei na ka bynta ki competitive exam.
“Ngi la ïakren ruh kumno ban jied ïa ki samla ba stad bad kiba proh kiba dei na ki longiing ba duk bad kyrshan pat ïa ki ba kin lah ban ïakhun ïa ki exam kum ka JEE, NEET bad kiwei kiwei,” u la ong.
La ïathuh ruh ba ki la kyrpad ba donkam ban don ïa ki coaching centre ha man la ki distrik bad block khnang ban ïarap ïa ki khynnah ba kin lah ban ïakhun ïa kitei ki eksam ïakhun kam.
Halor kane, u la ïathuh ba na ka liang u Myntri ula kular ban rah ïa katei ka mat bad u Myntri Rangbah ka jylla namar bun ki bynta ba ki kren hangtei kadei beit bad ka tnad ba bat u Myntri Rangbah ka Jylla, Conrad K Sangma.
