Shillong, Nailur 19 : Ka sorkar MDA ka dei ban bishar bniah bha halor ka jingthmu ban buh ïaka Casino ha ka jylla, ong u Lamphang ka ïing Dorbar Thawaiñ ka jylla u bah Metbah Lyngdoh.
Ha ka shithi ba ula phah sha u Myntri Rangbah u Conrad K Sangma, u bah Metbah uba long ruh u President ka UDP u la ong ba ka la mih ka jingsngew pyrshah jur na baroh ki liang, na ki seng saiñ pyrthei, ki seng bhalang, ki seng niam ruh kumjuh halor kane ka jingthmu jongka sorkar ban ailad ban plie ïa ka Casino ha kane ka jylla.
Ha kane ka shithi sha u Myntri Rangbah ula suh lang ruh ïa ka kopi jongka shithi na u Rev. Edwin H Kharkongor, Secretaryka Khasi Jaintia Christian Leaders Forum (KJCLF) kaba pynpaw ka jingpyrshah jur halor kane ka jingthmu.
“Kumta nga kwah ban pynpaw ba kumba la ïeng pyrshah da kiba bun khamtam na ki nongïalam niam, ka sorkar ka dei ban shim khia bad bishar bniah bha ïa kane na ka bynta ka bha ka miat jongka jylla” ong u bah Metbah.
