Shillong, Jylliew, 10: Ka Seng Biria U Khasi (SBUK) ha ka sngi Thohdieng ki la ïasoi ïa ka Soskular bad ka Fraternity Arts Cine Entertainment Shillong (FACES) ha Shillong Press Club, Shillong da kaba buh hakhmat ïa ka thong ban pynphriang ïa ki jingïalehkai drama Khasi ym tang ha ki jylla ka ri India hynrei wat shabar ri.
Kum ban shu pynkynmaw hangne, ïa ka Seng Biria U Khasi la seng ha ka 2 tarik, Jylliew, 1989 bad kane ka kynhun ka dei kaba la paw bha ha ki snem ba la leit noh ha kaba pyni ïa ki jingïalehkai drama biria kiba la pynïap biej haduh katta katta ïa ki paidbah nongshong shnong jong ka jylla. U General Secretary ka SBUK u Bah M. D Tmar u la ïathuh na kiba bun ki daw ba kane ka seng kam shym la lah ban leh eiei ha kine ki sngi hadien ka jingkhladnoh jong ki dkhot ba snar jong ka kynhun.
Ha ka jingïakren bad ki lad pathai khubor u Bah M D. Tmar u la ïathuh hadien ba ka la don ka jingïakren sngewthuh jingmut bad u nongïalam ka FACES u Bah Paradip Kurbah da ka jingmut ban pynkhie im biang ïa ka seng SBUK. U la ong ba ha ki por ba ladep ka SBUK ka la lah ban pynmih shibun ki Biria ban pynsngewtynnnad ïa ki nongpeit, nangne shakhmat kane ka seng kan sdang biang ban bteng ïa ki jinglehkai biria kumba ka juh leh ha ki snem ba la leit noh.
Na ka liang jong ka SBUK bad ka FACES kin sa nang pynheh bad nang pynïar ïa kane ka kam ak drama da kaba pynlong ïa ka Drama Festival bad kiwei dei ki prokram bapher bapher.
