Soi MoU ka JHADC bad ka Earth-Tree ban pynjyrngam biang ïa ki khlaw ba khmih ka JHADC

Jowai, Nailar 05: Ki dkhot ka Earth-Tree bad ka tnat Forest ka Jaiñtia Hills Autonomous District Council (JHADC) ha ka sngi Baar ki la soi ïa ka Memorandum of Understanding (MoU), ha kaba ïadei bad ka projek thung tynrai dieng ha ki jaka ne ki lum ki them kiba la syllen kiba don ha rilum Jaiñtia, ki jaka ba dang hap hapoh ka jingpeit jingkhmih jong ka District Council.
Ha ka jingïalang ba la pynïaid da u Consultant ka Earth-Tree u Bah H.H Mohrmen, u Director ka Earth-Tree u Bah Sunny Donkupar Mawiong u la ong hadien ba la ïohi ïa ka jingsah shrah ne syllen jong ki lum ki wah, kaba la ktah ïa ka mariang ka ban ktah ïa ka koit ka khiah jong ki pateng ki ban dangwan, kumta lyngba kane ka project thung dieng kan wan rah ka jingïarap shibun khamtam ha kaba ïadei bad ka mariang.
U u CFO ka JHADC Bah F. Blah, ula ong kumba long mynta ka jingdon jong ki dieng ki seij ka la duna bha, hynrei lyngba kane ka project kaba la buh ïa ka por haduh 40 snem ban heh ban san kine ki dieng ban wanrah biang ïa ka jingjyrngam jong ka mariang. Shuh shuh ula ong kumba long mynta ki briew ki ïoh ban pyndonkam ïa ki dieng kiba dang lung ban shan ïing shna sem bad ki bym lah ban neh slem ym kum ki dieng kiba la heh la san kiba lah ban neh slem.
U la ai khublei ruh ïa ka Executive Committee jong ka JHADC kaba la peit jngai na ka bynta ka jingpynneh pynsah ïa ka mariang kaba la pdiang ïa kane ka project thung dieng ha ki jaka jong ka Council kiba don kylleng ka Ri Lum Jaiñtia. Na ka liang jong u ma Blah u la kyntu ruh ba dei ban thung ym tang ïa ki dieng hynrei ïa ki diengsoh ruh kumjuh kiba lah ban ai jingmyntoi ïa ka Council. U Chief Operating Officer ka Earth-Tree u Dr. S N Gosawami u la ong kane ka dei kawei na ki projek kiba don ha ka jingdei bad ki sawdong sawkun jong ka mariang ha rilum Jaiñtia.