SHILLONG, Kyllalyngkot 21: Ka thaiñ shatei lam mihngi ka la ïoh ïa ka sienjam kaba kongsan na ka bynta ka jingïalehkai phutbol hadien ba la ïasoi ïa ka Deed of Contract hapdeng ki synjuk ïalehkai phutbol jong ka thaiñ shatei lammihngi bad ka kompeni Bestserv Inc. ban sdang ïa ka lympung Northeast Football League.
Ïa kane ka jingïasoi la pynlong ha ka sngi Ba-ar ha KiranShree Grand Guwahati, Assam.
Kane ka league ka thmu ban pynbit pynbiang ïa ka rynsan ïalehkai kaba thikna na ka bynta ki nongïalehkai jong ka thaiñ katba ka kyrshan ruh ïa ki synjuk phutbol jong ki jylla ban long kiba lah ban pynneh pynsah ïalade. Kane ka sienjam ka dei ka jingthmu kaba kongsan ban pynkhlaiñ ïa ka rukom ïalehkai phutbol bad ban thaw ïa ki lad ki lynti kiba neh slem na ka bynta ki sap ba don ha ka thaiñ.
Ha kane ka jingïalang la ïashim bynta da u Luis Nakawa, Chairman bad u Josef Kovac, International Development Manager jong ka Bestserv Inc., ryngkat ki nongmihkhmat na baroh ki 8 tylli ki synjuk phutbol jong ka thaiñ Shatei Lammihngi (State Football Association).
Kane ka jingïatreilang ka long kaba kongsan ban kyntiew ïa ka jingroi bad jingkiew jong ka phutbol ha kylleng ka thaiñ shatei lammihngi.
Ka Northeast Football League kan kyntiew ïa ka kyrdan ïakhun, kan pynroi ïa ki sap ba shapoh (grassroot), bad kan ailad ïa ki nongïalehkai ban ïoh mad ïa ka jingshemphang ha ka jingïalehkai phutbol kaba kham khlaiñ, kaba plie lad ïa ka thaiñ ban mih paw kum ka thaiñ kaba khlaiñbor ha ka phutbol India ha ki snem ban wan.
