Snohkti lang ki jaitniam bapher bapher ha ka Silent Peace Rally ka Balang Catholic ha Shillong, pynher dorkhas sha President ka Ri

Shillong, Nailar, 05: Da ki hajar ngut ki riewngeit jong ki Balang bapher bapher bad ki jaidbynriew bapher bapher ki la ïashim bynta lang ha ka jingïaid paidbah ba jarjar ba la pynlong da ka Catholic Association of Shillong (CAS) ban kyntu ïa ka President ka ri India ka Droupadi Murmu ba kan tuklar lem ban pynkut noh ïa ka jingïaumsnam ha ka Jylla Manipur kaba la neh mynta la lai bnai kynthih.
Ïa kane ka jingïaid rally kaba la sdang na Madan Iewrynghep la lamkhmat da u Archbishop ka Jylla Niambah Shillong u Most Rev. Victor Lyngdoh, ryngkat ka jingsynlang lang jong u Bishop ka Jylla Niam Nongstoiñ u Most Rev. Wilbert Marweiñ, u Bishop Elect jong ka Jyllaniam Jowai u Bishop Ferdinand Dkhar, kynthup ruh u dkhot jong ka KJP Assembly Synod Sepngi u Rev. WC Khongwir, u Bishop Purely Lyngdoh uba mihkhmat ïa ka Church of North India (CNI), u President ka Meghalaya Christian Leaders Forum (MCLF) u Rev. Himanshu Christian, u Executive Secretary jong ka Presbyterian Church of India (PCI) u Rev Lalrinkima, u Executive Secretary jong ka Achik Baptist Krima XII, Shillong u Pastor R. Jakrikra R. Marak, u Bah H. Nongspung uba mihkhmat ïa ka Church of God, Ecclesia, u Secretary jong ka Khasi Jaiñtia Christian Leaders Forum (KJCLF) u Rev Dr. E. Kharkongor bad kiwei kiwei kiba la ïashim bynta ha ki jingduwai ha kane ka sngi.
La sakhi ruh ïa ki nongïalam jong ki seng saiñpyrthei bapher bapher kiba la ïashim bynta ha kane ka jingïaid paidbah ba kynthup ïa ka nongïalam jong ka NPP ka Dr. Ampareen Lyngdoh kaba long ruh ka Myntri Sorkar, u nongïalam ka Congress Legislature Party (CLP) u Bah Ronnie V. Lyngdoh uba long u Nongïalam ka Liang Pyrshah, u State President ka All India Trinamool Congress u Bah Charles Pyngrope uba long ruh u MLA jong ka Nongthymmai Constituency, u MLA ka BJP na South Shillong Constituency u Bah Sanbor Shullai, u MLA ka Voice of Peoples Party (VPP) na North Shillong u Bah Adelbert Nongrum, u Bah Alexander L. Hek uba long u Myntri ka Sorkar Jylla, u MLA ka Jirang Constituency u Bah Sosthenes Sohtun, u MLA ka Mawhati Constituency u Bah Charles Marngar bad ka MLA jong ka Sutnga-Saipung Constituency ka Kong Santa Mary Shylla.
Ki jaidbynriew na ka Jylla Manipur kiba sah ha kane ka jylla Meghalaya ki la ïashim bynta lang ha kane ka jingïaid paidbah ba jar jar.
Ki khynnah skul kiba la ïashim bynta ha ka jingïaid paidbah ki la rah ïa ki plakad kiba thoh, “sangeh noh ka jingïaumsnam ha Manipur,”, “ka khmat namar ka khmat kan shu pynmatlah ïa ka pyrthei,’ “ka jingsuk mynta, ka jingsuk lashai, ai ba ngin ym pynngam jyllop ïa ka pyrthei ha ka jingsngewsih,” “to ngin kdup ïa ka jingitynnat jong kawei pa kawei ka lariti bad ka jingngeit ban pynkha ïa ka jingsuk,” “sangeh noh ka thma.”
Ki nongïalam jong ki kynhun niam ki la shim bynta lang ha ki jingduwai ha ka jingïalum lang ha Don Bosco Mini Stadium bad hadien kane, la pynbud sa ka jingpule ïa ka dorkhas ban phah sha ka President jong ka ri India lyngba u Lat ka Jylla u Phagu Chauhan.
“Ngi jaw ummat namar ka jingduh noh jong ki mynsiem bakordor, ka jingshah pynjurlong ki jaka mane blei bad ki shlem ai jinghikai. Ngi sngewsih ruh ban tip ba ki bor sorkar ki la pyndonkam bakla ïa ka bor ka iktiar ban thombor ïa kiba jaidbynriew ba luilui ha Manipur, khlem da ïoh ïa kano kano ka jingshah pynsajia,” ong ka dorkhas sha ka President ka ri ba la soi da u President ka CAS u Bah JA Lyngdoh bad u General Secretary u Bah Barnabas Nangbah.
“Kum ki nongshong shnong ba don jingkithlieh jong kane ka ri, ngi dawa ïa ki nongleh kam bymman ba dei ban pynshitom. Ngi kyntu ba phin tuklar da kaba bthah ïa baroh ki bor ka aiñ ban ai jingïada ïa ki paidbah ha kane ka ri bad ïa ki Commission bapher bapher kum ka Human Rights Commission bad kiwei kiwei ki Commissions na ka bynta ka jingïada ïa ki kynthei bad ki khynnah, na ka Sorkar Pdeng bad ka Sorkar Jylla, bad ban shim khia ïa baroh ki jingkhia kiba la jia ha ka jylla Manipur,” la bynrap ka dorkhas.
“Ngi kyrmen bad ngi ngeit ba lyngba ka iktiar jong phi yn ym lah ban pynsngapjar ïa kum kine ki jingjia kiba pynphlei snam ïa ka ri bad ngi duwai ruh ba phin leh eiei noh mardor khnang ba kan long kum u kyrwoh jong ka jingsuk da kaba shim ïa ki lad ki lyunti ban ïada ïa ka jingim jong ki paidbah bad ïa ki jingdon jingem, ban pynïoh biang ïa ka hok longbriew manbriew bad ban wanrah ïa ka jingïatylli katkum kaba la pynkupbor da ka aiñ jong ka ri, ka Riti Synshar ka Ri India, dei ban pynïoh ïa ka hok bad ka hok ka dei ban ieng rasong,” la ong shuh shuh ka dorkhas.
Ka CAS ka la pynpaw ruh ïa ka jingsngewsih halor ka jingshah thombor jong ki kynthei ha kaba la sloit lyngkhuid wat ïa ki jaiñ bad la leh be-ijot ïa ki, la thab, la kynjat, la pynïaid lyngkhuid hakhmat u paidbhur bad la leh be-ijot ruh ïa ki kumba la sakhi ha ka rynsan social media.
Ka CAS ka la kynthoh tyngeh ïa ki briew kiba don ha bor khmatam ïa ki bor Pulit kiba shu long tang ki nongpeit kai na ki kali ïa ki jingïaumsnam bad ban ailad ïa ki paidbhur ban pynhiardor ïa ka longryngieng jong ka kynthei bad ban dkhat jubor ïa ka jingim u khun shynrang uba 19 snem ka rta bad ïa u kpa ha surok katba ki dang pyrshang ban ïarap ïa ki lanot (khun kynthei jong ka ri) na ka jingshah thombor ha ki paidbhur.
“Kane ka jingïaumsnam ka dei ruh ka dak ka jingshah thombor jong ki Khristan ha kaba palat 249 tylli ki ingmane ki la shah pynjulor ha Imphal Valley jong ka Jylla Manipur,” la pynpaw ka dorkhas bad bynrap, “kum kane ka jingthombor da ka jingisih ka la ktah ïa baroh ki shynrang, ki kynthei bad ïa ki khynnah bad nalor ka jingduhnoh ïa ki ing ki sem.
“Ki bor synshar kim shym la lah satia ban ïada ïa kiba luilui bad ban pynneh ïa ka shongsuk shongsaiñ ha ka Jylla. Ngim lah khlem da pynrem jur ïa kum kine ki kam ïaumsnam ba shyrkhei ha ka jylla Manipur,” ong shuh shuh ka dorkhas.
Shwa ban pynkut ïa ka jingïalang, ka Synjuk ki Kynthei Katholik ki la pynlong ruh ïa ka jingthang mombati na ka bynta ki mynsiem ba la khladnoh kiba la duhei ïa la ka jong ka jingim ha ka jingïausnam ha ka Jylla Manipur kaba la neh mynta la lai bnai kynthih.