Shillong, K’Lyngkot 06: Ka jingthmu jong ka sorkar ban wanrah bad pynlong ïa ka nongbah Shillong kum ka smart City lah ban ong ba ka la long kaba ym pat kob naba kumba long haduh mynta kiba bun na ki jaka khamtam eh ki surok ki dang long kiba sniew bad ki bym don kiba shim khia.
Ha kaba ïadei bad kane haba na ka liang jong u nongthoh khubor u la ïoh ban leit jurip ïa kiba bun ki jaka la shem ba kiba bun na ki ki dang long kiba sniew dur bad ki jingbym pat lah ban maramot satia.
Kawei na ki surok kadei kaba don ha Civil Hospital Shillong kaba don ruh ha markhmat jong kane ka jaka sumar bad kaba dei ruh kaba don hajan ki jaka ba die ja bad kiba die sha ha kaba ha kane ka jaka la ïohi ba ki don ki surok kiba la sniew bha bad kiba la donkam ban maramot noh.
Ym tang ka jingsniew, ka jinglang jong ka um ktieh ha kane ka jaka ka la long kaba isaitmet bad kaba sma iwtung bha kumta la donkam ïa ki bor ba dei peit ba kin shim khia ïa kane ka kam kaba long kaba kongsan bha na bynta ki briew kiba ïaid ba ïeng na kane ka jaka bad khamtam eh ba kane ka surok ka dei kaba don hajan jong ka jaka sumar.
Ha kaba ïadei bad kane ba bun na ki paidbah ki la pynpaw ïa ka jingdonkam ban maramot noh ïa kane ka surok kaba dei kaba la sniew la bun bun bnai bad kan long ruh ka jingleh raiñ ïa ka sorkar jylla lada kam lah ban shim kam ha kaba ïadei bad ki jingsniew palat jong ki surok kiba don ha ka jylla bad khamtam ha ka nongbah Shillong da ka jingai daw halor ka smart city.
