Nongstoiñ, Naiwieng 27: Ka Dorbar Bah ka Synjuk ki Rangbah Kur ka Bri u Hynñiewtrep Shnad West Khasi Hills District, kan long ha ka 29 Naiwieng 2025 (Sngi Saitjaiñ) mynta u bnai naduh ka por 11 mynstep ha MECOFED Hall New Nongstoiñ.
Kumta la kyrpad ïa kawei pa kawei ka kur ne seng kur hapoh ka District ban phah haduh 10 ngut ha katei ka jingïalang.
Ki mat ïakren kin long ban pynkhlaiñ ïa ka synjuk, ban pynneh pynsah ïa ka kam seng kur seng jait kaba katkum ki riti ki dustur ba la sdang naduh ki myn barim bad katto katne ki jingeh ba ka jaidbynriew Khasi ka ïakynduh ha kine ki sngi.
Ha katei ka sngi yn ïadonlang ruh ki nongïalam jong ka sengkmie ki ban wan ban pynshai ïa kiba bun ki mat treikam bad ki nongrim jong ka synjuk. Kane ka long katkum ka kyrwoh kaba la ai da u bah R.S Khardewsaw, President Ka Synjuk Ki Rangbah Kur Ka Bri u Hynñiewtrep West Khasi Hills District bad u bah P.W.Myrthong Secretary, Ka Synjuk ki Rangbah Kur ka Bri u Hynñiewtrep West Khasi Hills District.
