Sngi Musiang: Leit kit ki khun ka Seiñ Raij Jowai ïa ki Dieñkhlam na Ïawmusiang

Jowai, Naitung 13: Ka lehñiam shad Behdieñkhlam jong ka Seiñ Raij Jowai ka la poi sha ka sngi ba lai (Musiang) ha ka sngi U Blei hapdeng ka jingïaidbeit ïaid ryntih bad ka jingiphuh iphieng kaba la sdang naduh ka por mynstep ha kaba la don ka jingpynïeng ïa ka Deiñkhlam ka ‘Bon” ha ka jaka ba ki khot ka ïong Rngad Wah (Khonraij).
Hadien kane ki khon Raij ki la leit rah ïa ka ‘Symbood Khnong’ na Loom Soo Ïung ban leit pynïeng ha Khlieh Shnong (Chilliang Raij). Katba ha ka por shiteng sngi ki Kmai Raij ki la pynlong ka jingïakynduh ha Mynkoi Pyrdi (Ïaw-Iongpiah) ban pynhiar ïa ki bom ki Bhuri bad leit sha ka jaka Datlawakor kumjuh sha baroh ki jaka ñiam ha Ïawmusiang.
Nangne ki khon ka Raij ki la leit pynpoi ïa ka ‘Khnong Blai’ ha madan Poh Sawiar khnang ba u Dolloi un ai ka pyrnah Khnong Blai ha u Kñi Nikhla ban pyndep ïa ka ñiam ka rukom da ka nguh ka dem ‘suit ka choor’.
Hadien ba la dep ka nguh ka dem ki khun ka Kmai Raij ryngkat ka jingsakhi lang ki kynthei na baroh ki Hynriew tylli ki Dong ki la leit rah na Ïawmusiang ïa ki Deiñkhlam sha manla ki dong ki shnat ban pynïeng ïa ki ha rangkat ki Bom ki Bhuri bad ka shad ka kmen. Nangne ki khon ka Raij ki la leit rah ban pynpoi ïa ka ‘Khnong Blai’ ha Madan Moosyiem ha kaba u Pator ula pynkhamti ïa ka kiad ha u Kñi Nikhla ban pyndep ïa ka nguh ka dem
Ha ka ‘Muchai’ kaba hap ha ka Lah Sngi u Blei kaba dei ruh ka sngi pynkut ïa ka lehniam shad Behdieñkhlam ka Seiñ Raij Jowai mynta u snem ha kaba yn wanrah ïa ki rong ki rup ba la shna kyrpang da ki dong bapher bapher ban pynhiar hapoh ka pung jong ka Syiem Aitnar bad kumjuh ïa ka Symbood Khnong bad ka ‘Khnong Blai’.
Katba ha ka por janmiet kan don ka Datlawakor hapdeng u Langdoh bad u Sangot Paswet.
Kum ban shu pyntip, ka Shad Behdeiñkhlam ba ‘saw sngi lai miet’ jong ka Seiñ Raij Jowai kaba la sdang ha ka sngi Pynsiñ kata ha ka 11 tarik mynta u bnai ba la shim bynta da ki khun ka Raij kiba la leit rah na khlaw ïa ka “Symbood Khnong” bad pynpoi ïa ka ha ‘Tre Kjat Loomsooïung’ New Hill, Jowai.
Ïa ka shad Behdeiñkhlam ha ka sngi sdang la pynlong naduh ka por mynstep bad la don ka bam Tyngkong ha ‘Iung Langdoh’ nangta ki khun ka Seiñraij Jowai ki la pynkhreh ïa ka ‘Siang ka Pha’ ban pyndep da ka kmie jong ka ïing kum ka jingburom ïa kiba la khlad na sla jong kane ka pyrthei.
Katba ha ka por janmiet ki khun ka Chilliang Raij (Khon Raij) ki la leit rah na khlaw ïa ka “Symbood Khnong” ha ryngkat ka shad ka kmen, ka pud ka tem ha shi lynter lynti haduh ban da poi ha New Hill Jowai.
Ha ka sngi kaar kaba dei ka ‘Mulong’ ha ka 12 tarik, mynta u bnai, naduh ka por mynstep u Dolloi, u Langdoh bad ki Waheh Wasan kin sdang ïa ka nguh ka dem ha ka “Syiem Aitnar” hapoh ka jingpynlut pynsep jong u Dolloi.
Ha ka porjanmiet baroh ki Kmai Raij naduh ka dong Panaliar, Dulong, Lumpyrdi Ïongpiah, Lumïongkjam, Tpep-Pale, Lumkyrwiang kin pynpoi ïa ki Deiñkhlam ha Ïawmusiang ha ryngkat ka shad ka kmen bad ka put ka tem, katba ki khun ka Raij kin pynpoi ïa ka ‘Khnong Blai’ ha Loo Sooïung.