Sngi ‘Mulong’: Wanrah ki Kmai Raij ïa ki Dieñkhlam ha Iawmusiang

Jowai, Naitung 01: Mynta ka sngi kaba dei ka sngi ba ar ‘Mulong’ jong ka shad ñiam Behdieñkhlam ka Seiñraij Jowai, na ka liang ki ‘Kmai Raij’ kila mih na ki hynñiew tylli ki dong ban leit rah ïa ki ‘Deiñkhlam’ na khlaw ban leit pynshong pynthiah ïa ki ha Iawmusiang, Katba ki khon Raij kila leit pynpoi ïaka ‘Khnong Blai’ haka jaka buh kaba don ha Loom Sooïung, New Hills Jowai.
Naduh ka por mynstep u Dolloi, u Langdoh bad ki Waheh Wasan kila sdang ïa ka nguh ka dem “Kñia Aitnar’ ha ka Syiem Aitnar bad ïa ki jingpynlut pynsep baroh la leh da u Dolloi ka Elaka Jowai, la ïathuh ruh ba ka jingpyndep ïa kane ka ‘Kñia Aitnar’ kan long ka jingkyrkhu ïa baroh ki khun ki hajar.
Ha kane ka juh ka sngi baroh ki Kmai Raij kila mih na Mynkoi Pyrdi ban pynhiar ïa ka bom ka Bhuri, ka tangmuri ha Biar ka Blai bad nangne kila leit mih sha Iawmusiang ban leit rah ïa ki Dieñkhlam na ki jaka khlaw.
Katba ha ka por janmiet ki Kmai Raij na baroh ki dong ki shnat ki la leit pynshong pynthiah ïa kitei ki Dieñkhlam haki jaka ba la pynkhreh ha Iawmusiang da ki hynñiew tylli ki dong, katba ki Khon Raij (Chilliangraij) kila leit ban thew shaw ïa baroh ki Dienkhlam jong ki Kmai Raij bad kim dei ban heh ïa ka Khnong Blai lada don kiba heh la hap ban pom pynrit ïa ki. Nangne ki khon Raij kila leit pynpoi ïa ka ‘Khnong Blai’ haka jaka buh ha Loom Sooïung, New Hills Jowai bad nangne baroh ki khun ka Kmai Raij kila leit phai naka juh ka lynti.
U Dolloi ula pyntip ba ka leh ñiam mynta ka sngi naduh mynstep kala long kaba bha ba miat wat hapdeng ka jingjur u slap, kum u Dolloi u ai ka jingkit bok kitrwai ïa baroh lyngba ka jingpyndep ïa ka Lehñiam kan wanrah ïa ka jingieit, ban bha u kba u khaw, ban lait na ki kam sniew bad ban beh ïaka pang ka shitom ne ka khlam.
La ïathuh mynta ka sngi Mulong “la pynmih ïa ki Dieñkhlam jong u lum pdeiñ ka bei pun ‘Tein’ na Dulong, ka bei pun ‘Wet’ na Panaliar, ka bei pun ‘Doh’ na Lumïongkjam bad na u lum Pdeiñ ka Lumpyrdi, ka Lumkyrwiang bad Tpep-Pale kiba long ki khun ka kmai Raij, ha ka por janmiet la leit rah kumjuh ïa ka ‘Khnong Blai’ jong ka bei pun ‘Bom’ na u lum pdeiñ ka Khon Raij”.
Lashai kaba dei ka sngi ‘Musiang’ ki Kmai Raij kin leit shim ïa kitei ki Dieñkhlam ban leit pynïeng sha manla ki dong, katba ki khun Raij kin leit rah ïa ka ‘Symbood Khnong’ ban pynïeng ha khlieh Chnong (Chilliangraij) bad ïa ka ‘Khnong Blai’ kin pynpoi hapoh Sawiar khnang ba u Dalloi un ai pyrnah Khnong Blai ha u Kñi Nikhla ban leh ïa ka ñiam ka rukom.