Shillong, Rymphang 21: U President ka National People’s Party (NPP) Meghalaya bad u Symbud Myntri Rangbah ka jylla u Bah Prestone Tynsong ha ka sngi Thohdieng ula pynpaw ïa ka jingsngewskhem ba ka party jong u kan khur ïa ka jingjop ha kane ka elekshon Khasi Hills Autonomous District Council (KHADC) bad Jaiñtia Hills Autonomous District Council (JHADC).
Ïa kane u la ong hadien ba u pyndep ïa ka jingthep vote, da kaba bynrap, “Kum u nongïalam ka party, ngi la ïaid kylleng ki jaka ka Ri-lum Khasi bad Jaiñtia bad ngi la ïohi ba ka jingkyrmen ka don ha man kawei pa kawei ka constituency lait noh ha ki katto katne kaba don ka jingïakhun. Kumta, ngi sngewskhem ba ngin jop ïa ka elekshon ha baroh kine ki ADC”.
“Ka NPP ka la kut jingmut bad aiti ban shakri ïa ki paidbah bad ka jylla lyngba ki lai tylli ki ADC lada ki paidbah ki ai ïa ka rai jong ki,” ula ong.
Haba kylli, u Bah Prestone ula ong ba ka party ka la leit rung ha manla ka shnong ban pynsngew ïa ki kam pynroi bapher bapher bad ka jingkongsan ban don ïa u MDC u ban ïarap lem ïa ka Sorkar ha ka ban wanrah ïa ka roi ka par ha baroh ki liang sha kawei pa kawei ka constituency bad ban nang pynkhlaiñ ïa ki ADC ba kin ai ka jingïada ïa ka Jaidbynriew.
Lah ban ong ba u Bah Prestone uba la mihkhmat haduh san samoi na Pynursla constituency, ula pynpaw ruh ïa ka jingsngewskhem ba u pyrsa bad kyrtong ka NPP na Langkyrdem-Laitkroh Bah Rahboklang Tynsong bad ka MDC ka Nongshken Kong Grace Mary Kharpuri kin ïoh ïa ka jingjop ha kane ka elekshon MDC mynta ka kynti.
