Shillong, Nohprah 16 : U Nongïalam ka NPP uba dei ruh u Myntri Sorkar u Timothy D Shira ula pynpaw ka jingsngewthikna ba ka party jong u, kan jop don burom ha ka elekshon MDC ha Garo Hills Autonomous District Council (GHADC), haba kdew ïa ki kam kiba ka party kala leh na ka bynta ka Council.
“Ngi la synshar ym tang ha Jylla hynrei wat ha ki District Council bad ngi lah ai ka jingshakri ba radbah ïa ki district council” ong u Shira ha ka sngi Ba-ar.
Ula kren halor ka jingsiew ïa ka tulop ba 12 bnai sha ki nongtrei ka GHADC, kaba la lah ban pynurlong da ka jingpyrshang jong u Myntri Rangbah ka Jylla Conrad K Sangma.
Halor ka jingkynnoh pyndonkam bakla ïa ka pisa, u Shira ula ong “Ki jingkynnoh kin don beit ha ka kam saiñ pyrthei. Wat lada ngi leh ïa ka kam kaba bha, kan don beit ka jingkynnoh, kan don beit ka jingpynrem. Kane ka dei ka kam jong ka Liang Pyrshah”.
Ula kynnoh ba kine ki jingkynnoh ki dei ka jingpyrshang jong ki Liang Pyrshah ban ïoh jingmyntoi ha ka kam saiñ pyrthei.
