Sngewthikna ka BJP ban jop biang ha Assam buh thong ban jop bun ha Meghalaya ha u 2028

Shillong, Iaiong 11 : Ka Bharatiya Janata Party (BJP) ka sngewthikna jur ban jop bun bad ïoh synshar biang ha Assam ha kane ka election MLA ba mynta bad ha kajuh pat ka por ka buh thong ruh ban jop bun ha Meghalaya ha u snem 2028, pynpaw u Nongpathai khubor ka BJP u bah M Kharkrang haba ïakren bad ki nongthoh khubor.
“ Ki paidbah ki kwah ïa ka roi ka par bad ka BJP ka la leh ïa kata ha kine ki shiphew snem. Na kata ka daw kam don kano kano ruh kaba ki briew ki shun bad sngewpyrshah ïa ka BJP” ong biang u bah Kharkrang.
“ Ka jingroi jingpar kaba ki paidbah ki la ïoh ha kine ki shiphew snem ka dei kaba kim pat ju ïohi satia ha ki sanphew snem kiba la leit noh. Na kata ka daw balei kin dang isih bad shun ïa ka BJP haba ka sorkar ka la leh bha shi katdei eh” ong u bah Kharkrang.
Haba phai sha ka Meghalaya shwa ka election MLA 2028 u bah Kharkrang u la ong ba kumba long mynta ka BJP ka la ïoh ka jingkyrshan na ki paidbah bad ka don ka jingkyrmen ban jop bun ngut ki MLA ha u 2028 ha Meghalaya.
“ Ha Meghalaya ngeit ïa kaba nga ong ha kane ka kynti ym dei shuh tang da ki tylli hynrei ka BJP kan poi phew ki MLA kynmaw ïa kane bad lada kam long kaba shisha phi lah ban wan ïa kynduh ïa nga ha u 2028” ong u bah Kharkrang.
U la ong ka BJP ka dei ka party kaba ïai trei lynter ym tang ha ka por election.
“ Naduh ba mar ïakut hi ka election ngi la sdang ban pynkhreh ïa kawei pat ka election.Ngi la trei la lai phew snem bad ngin dang ïai bteng sa tang arsnem bad kynmaw bha ka BJP kan jop da ki phew mynta ka kynti ha ka election MLA 2028” pynkut u bah Kharkrang.