Shillong, Jymmang 14: Ka United Democratic Party (UDP) hynne ka sngi saitjaiñ kala pynpaw ïa ka jingsngewskhem ba kan lah ban thaw bad ïalam hi ïa ka Sorkar Jylla ha u snem 2023.
“U 2023 un dei u snem ha kaba ki paidbah kin ïohi ïa ka jingkylla ha Meghalaya. Ngin ym long shuh tang ki nong bud ne shu iadonlang ha ka Sorkar hynrei ka UDP kan ïalam hi noh ïa ka Sorkar” ong u President ka UDP Shillong City District Youth Wing samla Manbhalang Syiemlieh.
Kat kum ka jingong jong u, kane kan urlong namar ki nongshongshnong ka Jylla kila dep mad ïa ki seng saiñ pyrthei bala ithuh kum ki National party bad bynrap “Namar kata, ka por kala dei ïa ki paidbah bankyrshan ïa ka UDP bad nga thikna ba ngin khur ïa ka jingjop ha ka elekshon MLA ban long lashem snem”.
Haba kylli ba ka UDP ruh ka hap shim ïa kajuh ka jingkitkhlieh halor ki rai bala shim da ka sorkar Meghalaya Democratic Alliance (MDA) ba ïalam da ka NPP, une u Nongïalam ki samla ka UDP ula ong “Watla ngi iadonlang ha ka Sorkar hynrei kam mut pat ba kaei kaba ka Sorkar lane ka NPP ka rai, ka UDP kan shu kyrshang lang beit ïa ki”.
Ula ong ba kila don ki khep ba ka UDP kala ieng pyrshah ïa ki rai bala shim da ka NPP haba pynpaw “ Ha ka elekshon MLA 2023, ngin sa ïaid la ka jong bad ngin sa kren halor kiba bun ki ishu bad ngin sa kren ruh ïa ki thong jong ngi hapoh ka Jylla”.
Haba pynpaw ba ka Party kam shym la sngap jar halor ka Memorandum of Understanding (MoU) bala iasoi hapdeng ka Meghalaya bad Assam ban pynbeit ïa ki jingïakjia pud ha ki 6 tylli ki jaka khappud, u Manbhalang ula ong “U Chief Executive Member (CEM) ka Khasi Hills Autonomous District Council (KHADC) ula dep jam shakhmat ban ïaid sha ka Ïingkashari ha kaba mudui pyrshah ïa ka MoU”.“Ym tang katta, u President jong ngi ruh ula kren sha ki paidbah ka Jylla halor kane ka kam” ula ong.
Halor ka jingpyrshah jong ki 11 ngut ki MDC ka NPP pyrshah ïa ka rai ka EC ban ujor sha Ïingkashari, une u samla ula ong “Ki paidbah kin sa ai jubab ïa kane, phin sa ïohi ïa ka jingshimkhia jong ka UDP halor akne bad phin sa ïohi ruh ba kiwei ki party kim don satia ka jingshimkhia. Ka UDP kala shim ïa ka sienjam ban ujor da ka mukotduma sha Ïingkashari”.
La ka UDP ka don jingthmu ban weng noh ïalade na ka Sorkar MDA, une u Nongïalam ki samla ka UDP ula ong “Ngam lah ban ong eiei ïa kane, ai ba ki Nongïalam jong ka Party kin shim rai ïa ka”.
Haba kyntait ïa ki jingkynthoh ba ki Seng Riewlum kynthup ka UDP ki shu kut tang ha Byrnihat, u Manbhalang ula ong ba ki seng riewlum kim kut satia tang hapoh u pud u sam jong ka Jylla Meghalaya.
“Ngan pynkynmaw ïa phi halor u Prog GG Swell. U dei u Deputy Speaker ka Lok Sabha bad ula ïakhun ruh wat ïa ka elekshon President ka Ri India.. Ngi dang don shibun ki Nongïalam khlem da jer kyrteng ïa ki kiba la paw shabar u pud u sam ka Jylla bad ka ri ruh kumjuh ban long ki Nongïalam. Kiba bun na ki ki dei na ka seng riewlum jong ngi” ula ong.
U Manbhalang u pyntip ba ki Nongïalam jong ka Party kin sa shim rai noh shen la ka party kan iatehlok ne em bad ka HSPDP kaba dei ka paralok ha ka MDA ban iatreilang ha ka elekshon MLA ban wan.
