Sngewskhem ka AITC ban jop bun ki kyrtong ha ka elekshon MLA- 2023 ha Meghalaya

Shillong, Ïaiong 24: U Nongïalam ka All India Trinamool Congress (AITC) ba khmih ïa ka Meghalaya Dr Manas Ranjan Bhunia hynne ka sngi U Blei ula pynpaw ïa ka jingsngewskhem ba bun ki kyrtong ka party (AITC) kin sa ïoh ïa ka jingjop ha ka elekshon MLA-2023 ha Jylla Meghalaya namar ka Sorkar MDA ba ïalam da ka National Peoples Party (NPP) kam shym la pynsngewtynnad satia ïa ki paidbah ka Jylla.
“Ngi da sngewskhem shisha hala ki jong ki Nongïalam la ka dei hapoh ka Jylla, ha ka District ne ha ki Block bad ha ka jingïalam u Dr Mukul Sangma bad Bah Charles Pyngrope, ka party kala nang khlaiñ bad ïoh ïa ka jingkyrshan na ki paidbah ka Jylla” ong u Dr Manas haba ïakren bad ki nongthoh khubor.
U Dr Manas ula ong ba kane baroh ka wan jia namar kane ka Sorkar ba ïalam da u Conrad Kongkal Sangma kala trei ha ka rukom ka bym pynsngewtynnad satia ïa ki paid nongshongshnong ka Jylla Meghalaya.
UDr Manas uba dei u Myntri ha ka Sorkar ka Mamta Banerjee ha West Bengal, ula wan poi hynnin ka sngi sait jain ha Shillong bad ïakynduh ïa u Dr Mukul Sangma lem bad kiwei kiwei ki Nongïalam na ka bynta ban ïakren halor ka jingpynkhreh jong ka party ïa ka elekshon MLA 2023.
Haba pynpaw ba ki don bun bah ki ishu pyrshah ïa ka sorkar MDA ha Meghalaya, une u Nongïalam ka AITC ula kdew ruh ïa ka Memorandum of Understanding (MoU) bala iasoi hapdeng ka Meghalaya bad Assam haba kynnoh “Kane ka Sorkar kala ai ei ïa bun bah ki jaka sha ka Jylla Assam kaba long pyrshah ïa ka mon u paidbah”.
U Dr Manas u ong ba kiwei pat ki ishu ki dei kiba iatakhuh bad ki Nongïalam, ka jinghiar ka ïoh ka kot, ka jing pyntreikam ïa ka ktien Hindi ha ki Jylla ak thaiñ Shatei Lam Mihngi kabym shym la pdiang da ki paidbah ka thaiñ.
Une u Nongïalam ka AITC ula kam ba ki nongïalam jong ka Jylla kila nang ïoh mynta ïa ka jingkyrshan na ki nongshongshnong bapher bapher ka Jylla. “Ngi la ïoh ïa ka jingkyrshan na ki stad ki jhad, ki nongtrei mon sngewbha bad ki briew ba ieid shisha ïa ka Meghalaya bad ki paidbah kiba angnud ban kyntiew ïa ka Jylla”.
La ka AITC kan sei kyrteng ha baroh 60 tylli ki Constituency, une u Nongïalam ula ong ba ïa kane ka kam hi yn sa shim rai hadien namar ka bor ka shong ha ka Chairperson ka AITC ka Mamata Banerjee bad ki Nongïalam ka Jylla Dr Mukul Sangma bad Bah Charles Pyngrope.
U Dr Manas u pyntip ba ka AITC kala dep thaw mynta ïa ka State Committee bad kumjuh ruh ki District Committee ha baroh ki 12 tylli ki District bad kine ki Committee kila bunkam ruh mynta ha kaban lah plie shuwa ïa ka Ophis jong ka party ha Jylla. U pyntip ba ka Party kan sa leit thaw noh mynta sa ïa ki Block Committee ha baroh ki 60 tylli ki Constituency.
Halor ki jingkynnoh ba kin don katto katne ngut ki MLA ka AITC ki ban sa leit iasoh noh sha kiwei ki party ha shuwa ka elekshon MLA 2023, u Dr Manas ula ong “Ngam don jingtip satia ïa kane. Ngan sa ïakren bad u Dr Mukul Sangma bad ngin sa peit ïa kaei kaba jia. Ngin ïai peitthuh ïa kane ka kam bad kiwei kiwei ruh kumjuh”.
Haba kylli, une u Nongïalam ula ong ba ka jingpyndonkam ïa ka bor jong ka pisa bad ka ksah kala nang pyntroiñ ïa ka jingmut jong ka riti synshar paidbah ha baroh kawei ka ri India.
Halor ka jingkynnoh ba ka AITC ka dei ka Party Bengali, u Dr Manas ula ong ba kane ka dei tang ka slogan jong ki Liang Pyrshah haba kdew ba ka Congress ka dei kaba la seng ha Bombay ha u snem 1885 bad ka BJP ha Gujarat bad Delhi hynrei kane kam mut pat ba ki dei ki party Bombay ne Delhi.