Shillong, Naiwieng 05: Ka nongïalam ka National People’s Party (NPP) bad ka MP barim ka Tura ka Agatha K Sangma ha ka sngi baar ka la pynpaw ïa ka jingsngewskhem ba ki nongshong shnong ka Gambegre kin jied bad vote ïa ka NPP ha kane ka elekshon shiteng samoi ka ban long ha ka 13 tarik u Naiwieng, khnang ban pynthikna ba baroh ki kam pynroi kin poi hapoh ka constituency.
Haba kren sha ki lad pathai khubor ka Sangma ka la ong, “Ngi la ïoh ka jingkyrshan kaba biang na ki nongshong shnong jong ka Gambegre. Nga hi shimet nga la ïakren bad bun ki briew bad la ïoh ruh ban iakren ha ki por ba ïalap ïa ka elekshon. Ka kam ka la long kaba ïaid bha bad nga tharai ba ki nongshong shnong jong ka Gambegre kin ym iehnoh bad la ïohi ruh ïa ki kam jong u Myntri Rangbah bad ki nongshong shnong ki la ïohi ïa ki kam jong ka NPP bad ka sorkar bad nga sngew ba ka Gambegre ka kwah ban don lang ha kane ka bynta bad ban ïoh ïa ka MLA kaba don bynta bad ka sorkar kan sa ïarap ban wanrah ïa ki kam pynroi bad ki skhim kiba bha.”
“Kumta nga ngeit shisha ba ki nongshong shnong jong ka Gambegre kin mih shakhmat ban thep ïa ki vote jong ki ha kane ka election bad khlem artatien kin peit hi sha kane ka sorkar kaba mynta, kin peit ïa ki kam jong u Myntri Rangbah jong ngi bad kumjuh ruh ïa ka kyrtong ka seng ka Dr Mehtab Chandee A Sangma. Ka Dr Mehtab ka dei ka kyrtong kaba la biang lut bad ka la don ka jingïoh mad kaba ïar bha ha ka jingim ki paidbah. Kumta nga sngew shisha ba ka don ka jingïasoh lang kaba biang bha bad ngin sa ïoh ïa ka result kaba bha,” ka la bynrap.
Halor ka jingkynnoh jong u nongïalam ka Congress bad u MP ka Tura u Saleng A Sangma ba ha kane ka elekshon shiteng samoi ka la pynbor ïa u Myntri Rangbah bad ki Myntri sorkar bad ki MLA ban leit kyrpad ïa ki vote, na ka liang ka MP barim ka la ong, “Nga tharai kane ka dei ka rukom ong kaba ym poi pyrkhat haba phai sha ka lynti jong ka elekshon namar ha kaba khatduh ma ngi kiba don hapoh ka saiñ pyrthei ngi hap hi ban kyrpad ïa ki vote na ki paidbah, ngi hap ban leit bad hap ruh ban trei shitom ha ka kam ïalap elekshon bad kane kam don ka jingbakla lada u Myntri Rangbah u pynlut ïa ka por bad ban ïalap, kam don kano kano kaba bakla haba ki myntri ki leit ban ïalap namar ka pyni haduh katno ki la shim khia ïa ka kam watla ka dei ka elekshon kaba rit.”
“Nga tharai kawei ka jingsneng ngi la dep ban mad ha kine ki snem bad ngim lah ban kheiñ sting ïa ka kam elekshon. Kumta donkam ban pynthikna ban ïoh ïa ka result kaba bha bad ban long barabor kiba don bad ki nongshong shnong ka Gambegre, kumta kane ka dei ka kam kaba bha haba u Myntri Rangbah u leit ban ïalap ïa ka elekshon,” ka la bynrap shuh shuh.
