Sngewsih u Dr. Mukul Sangma bym pat treikam ka jaka sumar ba 100 jingthiah ha Mawkyrwat

Mawkyrwat, ‘Nailur, 25: U Nongïalam jong ka Liang Pyrshah u Dr. Mukul Sangma ha ka sngi saitjaiñ u la hiar jurip ïa ka CHC, Mawkyrwat, South West Khasi Hills District ba 100 jingthiah ka bym pat pyntreikam satia haduh kine ki sngi watl hadien ba ladep buh ïa u mawnongrim naduh u snem 2011.
Hadien ka jingjurip, u Dr. Mukul ha ka jingïakren bad ki lad pathai khubor u la pynpaw ba ka jingleit jngoh kyrpang ïa kane ka jaka sumar ba 100 jingthiah bad kumjuh ruh ïa ka CHC ha Mawkyrwat ka long ban iohi da la ki khmat haduh katto ka jingtrei ka la ïaid.
Ha kaba ïadei bad ka jaka sumar ba 100 jingthiah, u Dr. Mukul Sangma u la ong ba ka long mar khongphong ban ïohi ba kane ka jingtei kaba la sdang bad buh ïa u mawnongrim naduh u snem 2011 hynrei haduh mynta u snem 2022 ym pat lah ban pyntreikam ha ka rukom kaba dei.
“Kane ka long ka long ka jingduhnong kaba khraw ïa ki paidbah kiba donkam ka jingïarap ha ka liang ka koit ka khiah,” u la ong.
U la ong ba ka Trinamool Congress kin sa pyrshang ban wad ïa ki lad ki lynti ban pyntreikam noh kham kloi ïa kane ka jaka ai jingsumar namar naduh u 2011 haduh mynta ka la long kaba por kaba slem bha bad kumjuh ruh kane ka jingtrei bad kiwei kiwei ki jingdonkam ha kane ka jaka kin long ka jingmyntoi ïa ki nongshong shnong hapoh ka South West Khasi Hills District, namar kumba ka long mynta ba hapoh CHC la jan baroh ki jingthiah la shlei da ki nongpang.
Ha kawei pat ka liang u Dr. Mukul u la pynpaw ruh ba ki jingeh ki lah ban don shibun kum ka ban pynbiang ïa ki nongtrei namar ka don ka jingbym ïadei hapdeng ka jingdawa bad jingpynmih ban siew ne pynbiang ïa ki jingdonkam ki nongtrei la ka long ïa ki General Doctor ne ki Specialist, hynrei watla kata un sa pyrshang ban leh ïa kaba dei eh da kaba kyrmen ba kine ki jingeh yn lah ban weng ha ka por kaba biang.
“Ka dei ka jingshisha ba kin treishitom ban pynïoh ïa la ka jong ka Medical College khnang ba ki samla kiba don ka jingthmu ban pule ha kane ka bynta kin ïoh ïa ki jingmyntoi kiba bun bad ba kin long ki nongshakri na ka bynta ki para briew kiba donkam ka jingïarap ha ka liang ka jingkoit jingkhiah,” ula ong.
Ha ka jingleit jngoh ïa kiba thiah pang hapoh CHC Mawkyrwat, u Dr. Mukul u la ong ba kane ka long ka jingpynshlur bad ai mynsiem ïa kiba donkam ka jingïarap namar bunsien ka ju long kaba eh ban pynkongnguh ïa ki briew ban wan phah sumar ha ki jaka sumar kum ban wan kha khyllung namarba ha kane ka jaka ai jingsumar la sakhi ba ki bun bha ki nongpang bad kane ka pynpaw ba ki briew ki long kiba kloi ban pyndonkam ïa kane ka jaka sumar kaba la don lypa.
Ha kane ka jingleit jurip ïa ka jaka sumar ba 100 jingthiah bad ka CHC Mawkyrwat u la ïoh ban ïa phylliew jingmut bad u District Medical & Health Officer (DM&HO), South West Khasi Hills District bad kiwei de ki ophisar bad ha kajuh ka por u la ai ka jingïaroh ha kaba ïadei bad ka ka jingpyndonkam ïa ki skhim kum ka Megha Health Insurance Scheme (MHIS) kaba la long ka jingïarap bad ai ka jingmyntoi shibun na ka bynta ki nongpang.
La synran lang ïa u Nongïalam ka Liang Pyrshah da u Additional Deputy Commissioner, South west Khasi Hills District u Bah L.T. Tariang, MCS, u Dr, W.L. Narry, Medical & Health Officer lem bad kiwei de ki nongtrei hapoh jong ka CHC Mawkyrwat, ophis District Mental & Health Programme bad napoh ka District Medical & Health Officer (DM&HO), South West Khasi Hills District.