Shillong, Nailur 23: Ka Seng United Hynñiewtrep Movement (UHM) ka pynpaw ka jingsngewsih halor ka jingjia shah pynïap ar ngut ki briew kata i Kong Niancy Riahtam bad i Heprit ba dang 5 snem ka rta i Erika Thabah (Bam Kwai ha Dwar U Blei) ba shong ba sah ha Dong Tariang A, Mawïong Umjapung kiba lah jah naduh ka 18 Nailur 2024 bad la lap ïa ka met ïap jong ki ha ka 19 Nailur 2024 na ka wah kaba tuid lyngba ka Macdonald Road.
Ka seng ka phah khubor sngewlem sha ki baïing jong kitei ki ar ngut ki mynsiem ba U Blei Un don ryngkat bad ki bad ba un pyntngen ïa ka ïing ka sem ha kum kane ka por ba sngewsih.
Ha kajuh ka por ka seng, ka kyntu ïa ki pulit ba kin shimkhia ban tohkit bad budien ban lap ïa ki runar ba donkti halor kane ka jingjia ba shyrkhei bad dawa ban pynshitom ïa ki briew ba donkti ban shim ïa ka jingim jong ka long kmie bad ïa i khyllung ba dang 5 snem.
“Ka aiñ ka dei ban phasi ïa kum kine ki nongleh bymman, ki bym don shuh ka jingïatip lem,” la pynkut ka kyrwoh na u President ka seng Bah Charlie J. Rani.
