Shillong, Lber, 30: Ka Meghalaya Editors’ and Publishers’ Association (MEPA) ka la pynpaw ïa ka jingsngewkyndit bad ka jingsngewsih kaba khraw halor ka jingkhlad noh jong i Kong Angelina Riazida Lyngdoh iba ju khot ieit i Kong Ria mynta ka sngi Balang.
I Kong Ria kum i nongpynmih (publisher) ïa ka kotkhubor U Nongsain Hima i la noh synniang shibun eh sha ka kam pathai khubor ha ka jylla bad i dei ruh i dkhot iba la rim eh jong ka MEPA. Kumta ka jingkhlad noh jong i ka la long ka jingduh kaba khraw ïa ka kam pathai khubor ha Meghalaya bad ruh ïa ka MEPA hi baroh kawei.
Na ka liang ka MEPA ka phah ka jingsngewlem sha ka iing i Kong Ria khamtam sha ki khun jong i kiba kynthup ïa i Bah Andrew W. Lyngdoh iba dei u Editor jong U Nongsain Hima, i Bah George B. Lyngdoh iba dei u MLA ka Umroi Constituency bad u General Secretary barim ka MEPA bad sha baroh ki bahaiing hasem jong kane ka iing kaba mad ïa kane ka jingjia ba sngewsih.
“Ngi duwai ba ka mynsiem jong i Kong Ria kan ïoh ïa ka jingjahthait bymjukut bad ruh ba ki matti jong i kin ïai sah pyrto junom,” ong u kyrwoh ba la phah da u General Secretary ka MEPA, u Bah John W. Thabah.
