Shillong, Jymmang 31: Ka Tour Operators Association of Meghalaya (TOAM) ha ka sngi Thohdieng ka la pynpaw ïa ka jingsngewkhia kaba jur ïa ka jingjia ba dang shen ha kaba ki arngut ki shi kurim kiba na Madhya Pradesh ki la jahrngai na ka thaiñ Sohra.
Ha ka 22 tarik mynta u bnai, ki shijur, kata, u Raja Raghuvanshi bad Sonam ka tnga jong u ki la poi ha ka shnong Mawlakhiat (Elaka Mynteng) da ka Scooty ba shu shim wai ban leit jngoh ïa ka jingkieng jri ha ka shnong Nongriat. Ki la ïadon lang bad u nongïalam lynti u Bha Wansai bad ki la sah baroh shi mied ha Shipara Homestay ha Nongriat. Hynrei ïa kine ki shi kurim ym shym la lap dien shuh naduh ka 24 tarik haduh mynta.
Ki bor synshar District bad ki bor Pulit kynthup ruh ïa ki paidbah na ki shnong ha ka thaiñ Sohra ki dang ïai bteng haduh mynta ban wad ïa ki shijur kiba dang jah rngai. “Ngi pynpaw ka jingsngewkhia, ka jingsngewlem bad ka jingdon ryngkat bad ki bahaïing hasem jong ki ha kum kane ka por,” la ong ka TOAM ha u kyrwoh ba la phah da u President ka TOAM Bah E. Banlumlang Blah.
“Kum ki nongpynïaid ïa ki kam jngohkai pyrthei, ngi la kut jingmut ban pynthikna ïa ka jingshngaiñ, ka bha miat bad ka jingburom ïa baroh ki nongwan jngohkai sha ka jylla jong ngi. Ngi pynpaw ïa ka jingsngewkhia kaba jur halor ka jingpynphriang ïa ki khubor bym pat lah ban pynshisha bad kiba lah ban ïalam bakla ha kaba ïadei bad kane ka jingjia,” la ong u Bah Blah.
Halor ka jingjahrngai jong u Raja Raghuvanshi bad Sonam ka tnga jong u ha Sohra haduh mynta ki lad pathai khubor na rithor ki la thoh da ki kyntien ki bym lah satia ban pdiang da kaba kdew ba ka Meghalaya ka dei ka jylla kaba ju jia khah khah ki kam runar bad ka bym shngaiñ.
“Ka TOAM ka pynrem jur ïa ki jingkynnoh bym don jingkitkhlieh da ki lad pathai khubor (na Ri-thor) bad ka jingkynnoh kaba la mih ha ki khubor bapher bapher khlem da pynshisha bha. Kum kane ka jingpathai khubor ym tang ba ka pynkulmar jingmut hynrei ka pynsniew dur ruh ïa ka nam babha jong ki nongshong shnong bad ïa ka kam jngohkai pyrthei baroh kawei,” la bynrap u Bah Blah.
“Ka jingkyrpad ka long sha baroh ki lad pathai khubor, ki nongpyndonkam Social Media, bad ki riewshimet ba kin kiar na kaba pynmih ne ïasam ïa ki khubor khlem da pynshisha bha. Ka jingpynbna khubor bad ka jingkynnoh khlem jingkitkhlieh dei ban sangeh noh,” u la ong.
Ka TOAM ka la kyrpad ruh ïa baroh ban ailad ïa ki bor ba dei peit ban pynlong ïa ka jingtohkit bad ban ïasam ïa ki jingtip kiba thikna ha ka por kaba biang. “Hapdeng kata, to ngin leh baroh da ka jingsngewrit, ka jingkitkhlieh bad ka jingburom ïa kito kiba shah ktah,” la kyrpad ka TOAM.
Ka Tour Operators Association of Meghalaya (TOAM) kan ai jingkyrshan ïa ki lanot ba la shah ktah bad ban pynneh ïa ka Meghalaya kum ka jaka kaba shngaiñ, kaba pdiang sngewbha ïa baroh ki nongwan jngohkai.
