Shillong, Ïaiong 30 : U Myntri Rangbah ka jylla, Conrad K Sangma u lai pynpaw ka jingsngewnguh ïa u Nongïalam jong ki MLA ka Trinamool Congress uba la pynkynmaw ban trei shitom shuh shuh khnang ba un dup lah ban jop biang ha ka elekshon ha u 2023.
“U MLA jong ka Trinamool u la ong ba u Myntri Rangbah ka jylla ruh un sa shah rem noh ha u 2023 na South Tura. Nga dei ban ai khublei shisha ïa u namar mynta nga sngewthuh ba nga hap ban trei shitom shuh shuh. Ngam kren kai, hynrei ngan nang trei borbah shuh shuh,” ong u Conrad haba kren ha ka jingïalang jong ka National People’s Youth Front kaba long dang shen ha ka nongbah.
Shuh shuh u ong ruh ba katei ka jingong jong u ka lah ban dei ba ki don ki kam kiba um pat lah ban pyndep lut ne sahteng. “Ngam biang lut . Kumta ïa kane kajuh ka khubor nga kwah ruh ban ai sha phi baroh kiba don hangne. Ka elekshon kam dei satia kaba suk, wat ju kheiñsting ba phi la jop lypa. Nga ju ong ruh ba ki don ar tylli ki rukom pyrkhat haba phi leit sha ka thma, kawei ka rukom pyrkhat ka long ba la jop beit kumta la kheiñsting ban kynduh ïa ki nongkyrshan ne leit mih ha ki shnong ki thaw bad kawei pat ban ym kheiñsting ne kheiñ shngaiñ ba la jop lypa.”
U Myntri Rangbah uba dei ruh ha kajuh ka por u National President jong ka NPP u la ong ba ka jingkheiñsting kadei ka dawbah kaba pynlong ïa bun ki kyrtong ban liem ha ka por elekshon. Nalorkata, u ong ruh ba u la rem ar tylli ki elekshon namar ka jingkheiñsting ba la jop beit.
Da kaba kyntu ïa ki MLA bad ki MDC ka party kiba donlang ha katei ka jingïalang, u Conrad u la ong ba da lei lei ruh kim dei satia ban kheiñsting ïa ka elekshon. “Ban tieng ïoh rem kadei kaba bha tam namar ka pynlong ïa phi ban nang trei shitom shuh shuh,” u la bynrap shuh shuh.
Kumta, na ka liang jong u, u da kyntu jur ruh ïa baroh ba da lei lei ruh kim ju dei ban kheiñsting ïa kano kano ka kam.
