Jowai, Nailur 19 : Ka West Jaiñtia District Sports Association (WJDSA) Jowai, kala pynpaw ka jingsngewnguh ïa uwei na ki nongshong shnong ka Jowai u ma Rapmiki Sutnga, uba la wan shakhmat ban synñiang da ka mon sngewbha sha ka Association da ka tiar ‘Stretcher’ ban pyndonkam ha ka por ban rah ïa ki nongïaleh kiba mynsaw ha ki jingïakhun phutbol na madan.
Ïa kane ka tiar Stretcher la aiti da utei u rangbah uba shong basah ha Chutwakhu Jowai uba dei ruh u khun jong u ma Pear Rymbai ha ki nongïalam ka WJDSA ha ophis treikam jong ka ha Dongmihsngi Jowai.
La pynsngew da ka WJDSA lyngba u Hony. General Secretary ma Lammat-oo Laloo ba kane ka jingnoh synñiang ka long shi bynta ban ai mynsiem bad ka long ruh ka nuksa kaba bha tam na ka bynta kiwei kiba don ka mynsiem ban pynkiew shuh shuh ïa ka kam ïalehkai Sports hapoh ka District.
Ha ka juh ka por ka Association ka ai ka jingkitbok kitrwiang ïa u ma Rapmiki Sutnga bad kumjuh ïa ka ïing ka sem jong u ba kin dang ïoh ïa ka jingkoit jingkhiah, ka jingstad jingshempang ha ki kam ki jam kaba manla ka ngi.
