Sngewnguh ka VPP ïa ka jingjubab kloi u Myntri Rangbah ïa ka kaiphod, expert committee

Shillong, Nohprah 20: Ka Voice of the People’s Party (VPP) ka la pynpaw ïa ka jingsngewnguh bad ha kajuh ka por u la pynpaw ka jingsngerwphylla ïa ka jingjubab kloi u Myntri Rangbah ka Jylla u Conrad K Sangma halor ka jingdawa jong ka ban pynmih ïa ka kaiphod jong ka expert committee ha kaba iadei bad ka state’s reservation policy, hynrei kala buh jingkylli ïa ka daw ba pynslem.
Katkum ka dur ne video ia kaba la pyllait ha ka sngi Saitjain, u khliehduh ka VPP u Ardent M Basaiawmoit u la ong, “Nga ai khublei ïa u Myntri Rangbah ka Jylla uba la jubab kloi ïa ka jingdawa jong ka VPP ha kaba ïadei bad ka kaiphod jong ka expert committee.Wat lada ka party ka sngew phylla ban iohsngew na u Myntri Rangbah ka Jylla ba ka daw jong ka jingpynslem ban pynbna ia ka kaiphod ka long namar ba ka kaiphod ka long kaba jrong bha bad kaba khia palat.”
“Kane ka dei ka sien kaba nyngkong ba ngi lap ia kum kane ka jingai daw.Lehse ka sorkar ba la ïalam da ka NPP ka pynbeit ïa ka jingbha bad jingtreikam jong ka polisi da kaba jrong bad jingkhia.La kumno kumno, ka seng ka kyrmen ba kane kan ym long ka jingkular thylli sha ki paidbah bad ba shen ka sorkar kan sa pynmih ïa ka kaiphod khlem da pynslem shuh,” u la ong.
Kane ka jingkynthoh jong ka VPP kala wan hadien ba u Myntri Rangbah ka Jylla u Conrad K Sangma, haba kren ha ki lad pathai khubor, u la pynthikna ba ka kaiphod jong ka kaiphod jong ka expert committee ha kaba iadei bad ka state reservation policy kaba la antad ka jingkhia ba haduh 200 kilo bad kaba don 4,000-5,000 hajar tylli ka sla bad mynta lah dep bad yn sa pynbna paidbah noh shen.