Khliehriat Iaïong 21: Ka Seng FKJGP South Eastern Border Area Circle (Elaka Lakadong & Rymbai) ka ai ka jingkhublei kyrpang ïa u nongmihkhmat ka thaiñ u Bah Kyrmen Shylla u ba dei ruh u Myntri ka tnat Social Welfare Department, uba la trei shitom ban shna pynbha ïa ka surok Rymbai Bataw Borghat Jhalalpur (RBBJ) Road lyngba ka Central Road Infrastructure Fund.
Na ka liang ka Seng ka la ong ba ka la ju pynsngew na ka por sha ka por sha une u nongmihkhmat ka thaiñ ïa ka jingdonkam ban wad ki lad ki lynti ban shna kham bha ïa kane ka surok namar ka long u bud lum ka roi ka por jong ki shnong kiba sah sha kine ki thaiñ khappud.
Kumta ka Seng ka ba peit ïa ka bha ka miat jong ki shnong ki thaw ka sngew kmen shibun ban ïoh jingtip ba ka Sorkar Pdeng lyngba ka Ministry of Roads Transport &Highway,Zone North East, ka la bhah ïa ka mang tyngka ka ba T24.160 klur tyngka na ka bynta ban shna pynbha ïa kane ka surok RBBJ Road ha ka jingjngai kaba 30 km naduh Rymbai bad kumta ter ter, bad ia kane la pyntip sha u Secretary, Public Work Department (R&B) ha ka tarik 30 Lber 2022.
Shuh shuh ka Seng ka la ong ba ym lah ban len namar kumba ka long mynta ïa kane ka surok ka ba la sniew la ïoh ban maramot lyngba ka jingtrei shitom jong u Bah Kyrmen Shylla MLA.
