Sngewnguh ka BJP Meghalaya ïa u Modi bad ïa ka Nirmala halor ka mang tyngka 2026-27

SHILLONG, Rymphang 3: Ka BJP Meghalaya ka pynpaw ïa ka jingsngewnguh ïa ka myntri pla tyngka jong ka sorkar India ka Nirmala Sitharaman, bad ïa u Myntri Rangbahduh ka ri u Narendra Modi ji, halor ka mang tyngka jong ka ri na ka bynta u snem 2026-27.
Katkum ka kyrwoh khubor na u Bah Maraiahom Kharkrang u nongai ktien ba rangbah jong ka BJP Meghalaya Pradesh u la ong, Ngi sngewkmen ban sakhi ïa ka jingroi kaba khlem pat ju jia mynno mynno ruh ha ka ïoh ka kot jong ka ri jong ngi hapoh ka jingpynïaid kaba ki nongialam ka sorkar pdeng.
Ha kine ki 12 snem ba la dep, ka ïoh ka kot jong ka ri India ka la kiew stet bha da ka jingkiew kaba skhem bad ka jingkiew dor kaba duna namar ki rai kiba la pynleit jingmut bha da u Myntri Rangbahduh u Modi, ong u Bah Kharkrang.
Shuh shuh u la ong ka sorkar, ka la shim ïa ki jingpynkylla kiba bniah ha ka ïoh ka kot sha ka jingthaw kam thaw jam, ban kyntiew ïa ka jingmih bad ban pynsted ïa ka jingroi.Hadien ka jingpynbna jong u PM ha ka sngi ba rakhe ïa ka sngi laitluid ha u snem 2025, palat 350 tylli ki jingpynkylla la pyntreikam kiba ai jingkyrmen ïa ka jingroi ka ioh ka kot jong ngi.
Ka ïoh ka kot jong ka ri kaba kiew bha ka kylla long ka jingmyntoi bad jingroi na ka bynta baroh kumba paw na ki kyndon jong ka mang tyngka, ngi ha Meghalaya ruh ngi thikna ba ngin ioh katba ka ioh ka kot ka nang iaid kiew, u la ong.
Ha kine ki snem, ki nongialam jong ka ri hapoh ka jingïalam u Myntri Rangbahduh jong ngi, ki la phai khmat kyrpang ïa ka bha ka miat bad ka roi ka par jong ka jylla Meghalaya, ki projek ba pyniasoh bapher bapher kiba la shim ha kylleng ka jylla ki long ka nuksa. Ha une u snem mang tyngka ruh, ka jylla jong ngi kan dang ïoh jingmyntoi na ki skhim ka sorkar pdeng kiba bun jait.
Ngi ai khublei ruh ïa ka central team halor ka jingïateh halor ka khaii pateng kaba hapdeng ka India bad ka USA.Baroh ar tylli ki ri ki ïeng ban ïoh jingmyntoi na kane ka jingïateh bad katba nang mih ki sngi ki jingmyntoi ki thikna ban tuid shapoh sha uwei pa uwei u nongshong shnong jong ka ri jong ngi.